World chess champion ni thei naupang ber Indian rawlthar Gukesh Dommaraju-a hlawhtlinna lawmpui nan Tamil Nadu sorkarin cheng vaibelchhe nga a pe dawn.
Ningani khan Singapore-ah champion lai Chinese player Ding Liren nen vawi 14 an inkhel a, kum 18 mi Gukesh chuan point 7.5 hmuin lehlamin point 6.5 a hmu a, vawi nga world champion ni thei Vishwanathan Anand zuiin Indian zinga World Chess Championship-a chak thei pahnihna a ni nghal.
World chess champion thar a nih rualin Gukesh hian lawmman pawisa fai cheng vaibelchhe 11.45 a dawng a, India rama a chenna Tamil Nadu chief minister MK Stalin chuan zirtawpni khan social media-ah a hlawhtlinna ropui a tihzia sawiin, lawmpui nan state sorkarin cheng vaibelchhe nga a pe dawn tih a puang.
Chess khawvela hnuhmu thar hnutchhiah a, kum 18 mi ni chunga world champion ni thei Gukesh-an ram pum a chawimawiin a tihming?ha tak zet tih sawiin, hlawhtlinna ropui zawk chang zui zel turin duhsakna a hlan a ni.
India rama chess khel thiam ber berte chawr chhuahna Chennai-a cheng Gukesh hi high school a kal lai, 2019 khan kum 12 leh thla sarih mi a nih laiin grandmaster nihna pek a ni tawh a, grandmaster ni thei zingah a aia naupang pahnih chiah an awm a ni.