- Centenary C. Lalzahawma
Khawvêl changkànnain Zofate rilru sukthlêk pawh kawng hrang hrangin a her danglam nasa hle a. Hei hian a tha záwnga hmasâwnna kawng hrang hrang min thlen rualin, a tha lo záwnga mi tam zâwk rilru ngaihtuahna a hèr danglam avàngin kan fimkhur a tûl hle.
Ni tin kan nuna a tel lova kan awm theih reng thilte hian kan sum tam tak a ei ral a. Hêng — incheina uchuak lutuk, dinhmun phu lova incheina hmanraw chi hrang hrangte, ruihtheih thil chi hrang hrangte, zûk leh hmuam chi hrang hrangte, lirthei man to leh changkâng tak tak, zu leh sa hmun panna atána lei mai mai te bâkah thil dang tam tak pawh a awm. Hêngte hian tûl lovah sum tam tak a ei ral a, a tel lo pawhin kan nung theih reng tho a, a tel lo hian kan màwi loh phah chuang hauh si lo. Hêng a tel lo pawha kan awm theih rengte kan ngaihnat luatah kan rilru kan tihah phah a, nasa zâwka hna kan thawh a lo ngai a, thawh chhuah tam har si, tûl lova hman mai mai atán chuan a uiawm duh khawp mai! Kan ram dinhmu phu lova thil man sáng uchuak tan tak te hian kan ramah harsatna tam tak min thlen a, ngaiah kan nei ang tih a hlauhawm hle mai!
Chûng thil tha lo zawng zawng pumpelh tùr chuan mi tinte mahni dinhmun mila nun dàn kan thiam a, kan mamawh, a tel lova kan nun theih loh thil pawimawh chauh ngaihtuah a, kan phu tâwka lungàwi thiam a pawimawh. thenawmpain pheikhawk sing tél man a bun avàng ngawta a bun ang bun ve kan tum chuan kan neih sumin a tlin lovanga kan buai phah ang. thenawmnuin zungbun nuai tél man a bun avàng ngawta a bun ang bun ve kan tum chuan kan buai phah theih bawk. thenawmpa leh thenawmnu nu leh pate khân thla khatah nuaih tél an hlawh a, kan nu leh pate’n thla khatah sâng tam pawh an hlawh phâk lo va. Anni’n thla khata sing tam an hlawh lai a, keini’n sang tam kan hlawh phâk loh chuan an khawsak mila lo khawsak ve ngawt chu a rem hauh lo vang. Chu an thil neih ang nei ve thei tùr chuan kan sum leh páiin a tlin lo va, neih ve ngei kan tum tlat si a. Chu kan thil tum tipuitling tùr chuan keimahni-ah setana thlèmna, a tha lam rêng rêng awm hauh loh thil sual tih duhna kan thinlungah a lo lût a. Kan thil duhzáwng ang zêlin min bei a, kan mamawh kan neih theihna a nih phawt chuan mahni taksa hralh mai duhna thinlung te kan lo pu a, rûk rûk duhna thinlung te kan pu a, sualna chi hrang hrang tih duhna thinglung mai ni lo, tual thah hreh lohna thinlung put mai piah lamah kan nun beidawngin mahni nunna hial lák pawh kan hreh loh phah fo thìn.
A hausa an hausain, sum neiin an nei tam si a, sum nei loin sum neia te awm dàn ni tin kan hmu ve si a. Dam chhúng khawsak a harsa si! An bultanna hriat tùr mumal tak awm lova vawi leh khata hausa ta thut lah an tam mai si a. Chutiang chu nih ve tumin kan han bei a, kan tisual a, kan tána chhiatna tùr thil a tàwp a tàwpah kan ti leh nge nge thìn. Awhna sualin min man a. Awm ngaihna hre lo, awm loh ngaihna awm si lo he leiah nun beidawng takin hun kan hmang a. Tih tùr leh tih loh tùr pawh hre lovin nî kan hmang ral thìn. Keimahni ber kan chìan miau loh avàngin a tha záwnga hmasâwn ngaihna rêng a awm lo fo mai!
He lemchan tual zâwl zau takah hian mi tin mai hian lem kan chang a, lem chang thiam deuh ten fak an hlawh a, chàwimàwi an hlawh a, lawm an hlawh tel thìn. Mi thil titheite bawkin mi thil titheitea hmélhriat thà an neih avàngin hna lák nikhuaah pawh mi retheite tán kawng a zim tual tual tawh a, hei hian mi tam zâwkte nun tibeidawngin sualna chi hrang hrang a pun phah a. Sumdawnna kawngah pawh ni se mi hausa thenkhatte’n mi retheite hmang tangkaiin, mi retheite kut hmangin rûl kua an zentir a, an mi mana te hi an rethei duh khawp a nia, a hlâwkna erawh mi hausate bawkin an tél thìn. Chhúng leh khat, nupui fanau nei kan nih tawh avàngin kan hmangaihte tán eng thil pawh tih kan hreh loh phah fo a, kawng dang zawh mai tùr hriat a harsa thìn. Kan ram hian mi retheite hmakhaw ngaitu ram hruaitu kan mamawh a, kan ram tlu chhe mék tungding lehtu kan mamawh.
Zofate Jerusalem kulh hi a chim mék a, chhan hman a la awm a nia. Hawh u, Nehemia ang khân mi dang kovah dah mai lovin mahni kovah dah ngam ila, tan i la tláng teh ang u. Jerusalem siam that hna a thawh lai khân Sanbalat-a leh Tobia te khân an tibuai a, tihchhiat an tum ngar ngar a; mahse, Pathianin a tanpui a, Jerusalem kulh a siam tha leh angin Zofa mi thiam tak tak ten Zoram hi a lo ropui a, a par vul zel theih nân te, hnam inlungrual, hnam taimà, hnam inhmangaih tak, sual zalen lohna ram, Zoram nuamah i siam ang u.