Aizawl: AH&Vety department Minister C. Lalsawivunga chuan nimin khan Saitual District Veterinary Hospital a hawng.
Hawnna inkhawmah C. Lalsawivunga chuan sorkar hmasain bul a lo tan tawh, Saitual District Veterinary Hospital bakah Laboratory building leh Veterinary Officer quarter hawn a ni chu lawmawm a tih thu a sawi a, Mizote chu ran vulh mi an ni tih sawiin AH & Vety department chu Mizote tan department pawimawh leh tangkai tak a nih thu a sawi.
C. Lalsawivunga chuan Mizoram chu ran chaw, artui leh sa thianghlim lamah a intodelh lo hle tih sawiin, District Veterinary Hospital chu hemi kawnga hmasawnna rawn thlen thei tur atana pawimawh tak a ni dawn tih a sawi a. African Swine Fever vangin ran vulh tute’n harsatna nasa tak an tawk a, chutih rualin beidawng loin theihtawp an chhuah chhunzawm zel thu a sawi.