Aizawl: Sports Minister Lalnghinglova Hmar chuan sorkarin kum tharah ram pum huap talent hai chhuah programme kalpui a tum a, chumi atan sorkarin Rs vbc 2.5 a pe tawh tih a sawi.
Nimin khan All Mizoram Karate Association, General Headquarters, Aizawl buatsaihin ni hnih awh tur, 28th AMKA State Karate Championship 2024-25 hawnna inkhawm chu Dawrpui Multipurpose Centre-ah neih a niin Sports Minister Lalnghinglova Hmar chuan khuallian a ni a, inelna hi a hawng.
Hawnna inkhawmah sports minister chuan kum tharah chuan sorkarin thil lian tak pakhat, ram pum huap talent identification programme kalpui a tum a, chumi atan chuan sorkarin Rs vbc 2.5 a pe tawh tih a sawi a. Talent haichhuah programme hi PPP mode anga kalpui tur niin infiammi, khawtlang leh sorkar tangkawpa hma lakna tur a nih thu sawiin, “He hmalakna turah hun puma hna nei lo coach ni lai mekte leh infiammi chawl tawhte tan sum lak luhna remchang a siam nghal dawn,” a ti.
Lalnghinglova Hmar chuan Mizoram State Sports Council hnuaiah sports discipline 33 a awm mek a, tun dinhmunah chuan a hran theuhvin hmunhma an la inngaihtuahsak vek thei rih lo mah se Aizawl-ah Multipurpose Indoor Stadium leh hmun dang pahnihah din tura ruahhman kalpui mek a ni a. Chungte siam zawh a ni hunah chuan AMKA pawhin state level championship buatsaih nan man chawia hall hawh a ngaih tawh loh tur thu a sawi.