Aizawl: AICC member Zodintluanga Ralte chuan ZPM sorkar kal dan uluk taka an thlir chuan, a lungawithlak an tih a rin loh thu a sawi.
Zodintluanga Ralte hian nimin khan Khawbung Zone Football Tournament a hawn zawhah, Khawbung tlang dung khaw hrang hranga Congress party mite hmaah thu sawiin, ZPM sorkarah hian thiltithei deuh leh a fawng chelhtute dinhmun chawisanin a awm a, mipuite rawkin an awm thung tih sawiin, “Hetiang zela kan kal chuan thil ti theite an hausa tual tual ang a, retheite rethei tual tualin, kan ram hi dinhmun duhawm loh zawkah a ding ang tih a hlauhawm takzet a ni,” a ti.
ZPM sorkar chuan buhfai man an tipung a, petrol atangin chhiah thahnem tak an la tih sawiin Zodintluanga Ralte chuan, “Hetiang ti lo hian sorkar lo kal tawhte khan mipui min enkawl thei a. Congress sorkar ngat phei chuan hmasawnna lian tham tak tak thahnem tak kan thawk a, chungte chu a sawia sawi mai ka ni lo, hmuh theihin a awm vek,” tiin, hetianga mipui an rawk lai hian an party hruaitute chu board chairman, Adviser to CM leh a dang dangahte thunin, an hlawh a let za chuangin an la tihpunsak zui a. Mipui sum hmangin nuam an tawl a, mipuite an hrek beh hi an hreh miah lo a. Tha ber leh dik ber tura inngai si hian mipui rawk chungin hna an thawk thei lo tih a sawi.
Congress party-in India ram pumah hma a sawn mek tih sawiin AICC member Zodintluanga Ralte chuan, “Mizoramah pawh hma kan sawn zel dawn. Sakhaw humhim duhtu Congress party hi India ramah a sorkar leh thuai dawn. Chuvangin, sorkar laipui zarzo tak tak turin Mizoramah pawh Congress a sorkar a ngai a, chumi atan chuan lo inbuatsaih lawk a tul. Kum nga chu a liam mai dawn, kum li bak ZPM hian hun an nei tawh lo, kum nga pawh hi an hmang zo lo mai thei. Chuvangin, Congress party-te tho harhin, sorkar leh turin tun atang hian i inbuatsaih ang u,” tiin an party mite a sawm.