Ruahsurin a tihbuai avangin Test vawi thumna Brisbane-ah Australia leh India an inhnehtawk a, India off-spinner Ravichandran Ashwin chuan ram tana cricket khelh a chawlhsan tih a puang.
Mualneitu Australia-in chak thei turin beiseiawm takin inning hmasaah an khel a, 445 siamin India-in 252-in a chhang let a, inning hnuhnungah Australia-in 89 siamin wicket sarih a hloh a, hun a tlem tawh avangin a duh tawk a ni.
India tan chak turin 275 siam a ngai a, vawiin ni hnuhnung berah run riat chiah a siam hman tihin ruahsur vangin khel chhunzawm theih a ni lo va, chak zawn awm lova an inhnehtawk rualin vawi thum an khelh tawhah tum khat ve ve chakin an intluk mek a, vawi nga an inkhelh turah December 26 atangin Melbourne-ah a vawi li nan an inkhel ang.
Test vawi thumnaah kum 38 mi Ashwin a lut ve lo va, ram tan a hun hnuhnung a nih thu a sawi a, cricket khelh dan chi hrang hrang atangin a chawl tih a puang.
Test vawi hnihnaah telin wicket khat a la a, ram tan kum 14 chhung inkhelin Test chanchina wicket la tam pasarihna a ni a, vawi 106 a inkhelh atangin 537 a lak bakah century vawi ruk a siam a, Indian bowler zingah wicket 619 latu Anil Kumble chiah a tluk lo a ni.
Ashwin hian India tan one-day international vawi 116 a khelh atangin wicket 156 a la a, Twenty20 international vawi 65 a khelh atangin wicket 72 a la bawk.