Sorkar flagship programme Bana Kaih Scheme hnuaia progress partner-te loan pekna atan Mizoram sorkar leh partner bank, State Bank of Insia (SBI), Mizoram Rural Bank (MRB) leh Mizoram Co-operative Apex Bank Ltd. (MCAB) te chuan Chief Minister Lalduhoma hmaah nimin khan inremna (memorandum of agreement) an ziak.
CM Conference Hall-ah inremna hi Mizoram sorkar aiawhin Lalmalsawma Pachuau, Secretary to the Government of Mizoram, Planning & Programme Implementation Department-in a ziak a, Dr. Lalrinchhana, Principal Adviser-cum-Additional Secretary, Planning & Programme Implementation Department chu hriatpuitu a ni a. SBI aiawhin Hubert S.Z Khobung, Regional Manager, Regional Business Office, Aizawl chuan a ziak a, Neeraj Kapoor, Deputy General Manager, Local Head Office, Guwahati chu hriatpuitu a ni.
MRB aiawhin Sheryl L Vanchhong, Chairman, MRB chuan a ziak a, Naveen Thapa, Chief Manager, Loans & NPA chu hriatpuitu a ni a. MCAB aiawhin A. Lallungmuana, Chief Executive Officer chuan a ziak a, H.Lalramdina, Assistant General Manager chu hriatpuitu a ni.
Inremna ziah zawhah chief minister chuan Chief Minister’s Bana Kaih Innovation Challenge a hawng leh bawk.
Inremna ziahnaah hian Lalduhoma chuan, “Bana Kaih Scheme chu a takin kan lo kalpui dawn ta a. Bank-te nena thawh dun ngai a nih angin kan thawhpui tur bank-te nena inremna kan ziak thei ta hi kan hlim hle. Mizoram tana ni chhinchhiahtlak, hmasawnna kawng dik min zawhtirtu hmalakna a nih ngei kan beisei a ni,” a ti.
Chief Minister Bana Kaih Innovation Challenge intihsiakna turte
- Department Innovation Challenge: Sawrkar department hrang hrangten project pakhat theuh rawn theh chhuakin intihsiakna neih tur a ni.
- District Innovation Challenge: Mizoram district zawng zawngten DC kaihhruaina hnuaia neih tur a ni a. Hetah hian NGOs, LC/VC, Self-Help Group (SHGs), Primary Agricultural Credit Societies PACS) te leh Society anga in-register zawng zawngte an tel thei dawn a ni.
- Higher Educational Institutes’ Local Immersion Challenge: Mizoram sawkar hnuaia college-te, central sawrkar hnuaia college-te leh private college-te he challenge-ah hian an tel thei a ni. Khaw hrang hrangah zirlaite kalin an riak ang a, an khaw kalnaten harsatna an tawhte zirchiangin, chhawk zangkhai theih dan an ngaihtuahsak ang.
- Inventor’s Challenge: Ngaihtuahna thar seng a, thil tha leh tangkai duang chhuak turte tan he intihsiakna hi buatsaih a ni. Thil thar/tih dan thar (innovation) a ni tur a ni a, Mizoram tana danglamna thlen duhte tan a tel theih vek a ni. Heng intihsiaknaah hian a titha zual bikte thlang chhuakin, lawmman siamsak an ni ang.
Intihsiakna kalpui dan tur kimchang hi Planning & Programme Implementation Department chuan an la tichhuak leh dawn a ni.