Chite lui thlenga lei paihah AMC che nghal

Aizawl: Aizawl Municipal Corporation (AMC) chuan Saiziki, Republic Vengthlang ram, ITI Veng chhunga lei vung paihin Chite lui a thleng tih a hriat ve leh rang takin hma a la nghal.

Hemi chungchang ngaihtuah nimin khan Aizawl Mayor Lalrinenga Sailo hovin emergency meeting an nei a. Saiziki, Republic Vengthlang rama lei vung paih avanga Chite Lui a leivung lut hi paihfai turin a neitu hriattirna pek ni se tiin an rel a. Nimin vek khan he lai hmunah Leivung leh Construction & Demolition Waste paihna atana hman tawh loh tur a nih thu a chhuah nghal bawk.

AMC-in an tar lan danin, lei vung leh bawlhhlawh paih ruk thinna hmunah CCTV dah turin Aizawl Smart City Ltd. ten ruahmanna a siam mekin, a dahna hmun tur pawh enfiah a ni tawh a. Hemi bakah hian hmun pawimawh bikah a rang lamin CCTV a dah an tum a ni.

Aizawl khawpui a than chak em avangin lei vung tihchhuah pawh a tam hle a, a paihna hmun a awm loh chuan kawngsir leh hmun remchang laiah a ruka paih thin hian harsatna tam tak a thlen thin avangin, mi tupawhin dan bawhchhia an hmu a nih chuan rang takin AMC ah hriattir thin turin an ngen a. Thlalak emaw Video emaw nen Ph No. 8575561415 ah Whatsapp kaltlangin report turin mipui an ngenin, “AMC-in dan bawhchhia a man te hi an phutawk hremna pek a ni thin,” an ti.

Local Council zawng zawng hnenah an area chhunga leivung paihna hmun lo zawng tura hriattirna an pe tih sawiin, “Hun rei tak atang khan AMC chuan Search Team dinin, leivung paihna hmun tur zawngin hmun hrang hrangah an lo thawkchhuak tawh thin a ni,” tiin, Aizawl Smart City Ltd. chuan leivung paihna hmun tur Khatla Veng-ah a siam mek niin an tar lang bawk.

• AMC-in phalna (license) a pek hmunah chauh leivung hi paih theih a ni a. Tunah hian leivung paihna hmun pasarih a awm a, chungte chu:

1. Durtlang Leitan (Owner – Lalhmachhuana, Ph – 9856090601)
2. Durtlang Leitan (Owner – Juliet Lalengkimi, Ph – 9862439478)
3. Saikhamakawn (Owner – Rozami, Ph – 9862880024)
4. Phunchawng (Owner – Lalmalsawmi, Ph – 9436141949)
5. Lawipu (Owner – Vanlalzawma, Ph – 9612164730)
6. Hlimen (Owner – Laltlanpuii, Ph: 8414962173)
7. Rangvamual (Owner – Julie Lallianzuali, Ph: 7347213192)