Hunpui vuakvetah hian halpuah leh halmawi lam chi hal lo tura khapna hi neih ziah a ni a, zawm erawh a hlawh lo thin hle thung.
Halpuah leh halmawi lam chite hi mihring hriselna atan a that loh mai bakah, tangkaina a nei tlem hle a. Mi lungphu tha lo zawkte tan hlei hlei hian a hlauhawm zual. Kan sim thei miah lo erawh hi chu a mak ve ngawt mai.
Engtiklai atangin nge he ti tak maia halpuah leh halmawi kan lawm chhoh tak hi hriatchian a har tawh a, kan khawtlang nuna bet ngai thil pawh a ni lo chunga heti khawpa kan buaipui leh lawm ta mai hi a mak ngawt mai. Hriselna atan a la tha lo em em zui lehnghal.
Sorkar hian kuminah pawh khapna thupek a siam leh tawh a, zawm theuh pawh i tum teh ang u. Phal loh thil titute hi man chhuah a, hremna na zawk pek dante hi awm se, Krismas leh Kumthar hlim taka mitin kan hman theih nan leh ralmuang taka kan awm theih nan khap lai titute zawnchhuah leh man kawngah sorkar hian a sipaite thuam chak zual se la, hrisel leh ralmuang takin hunpui hman i tum ang u.
Thupek khauh tak chhuaha, a hmalatu tur an awm leh thin si lo lai hi pawikhawihtute hian an hrechiang thei em em a, kuminah pawh khapna thupek zawm lo an awm a nih chuan an chunga na hrek hrawka hmalakna awm ngei se la, sorkar pawhin halpuah pakhat haltute thlengin umzui ngat ngat se kan ziaawm deuh ngeiin a rinawm.