- LH Hauheng, Nghilhloh Run
Kamkeuna:
Zingkar boruak a vawtvin tãk a, hawina lam apiangah dai a tla a, zingkar ala ni bawk a, boruak ala hnawng deuh chap a; ni a rawn tlángsàng a, kan kawmthlangah — Japanhlo te, Pholeng te a rawn pâr a, tin, Tlangsam leh Builukham pâr te a rawn kuhmum tan leh ta bawk a, sulhnu mu hnu kai thovin lung a leng em em mai a ni.
Nausêntèt lai:
Naupang chumchiap tih takah kan hunlai (kan la naupan lai ti ve khanglang ila) khatih hunlai te khan hnim bawh-en kan hrat hle a, nuam kan ti tel bawk a. Sikul chawlh a lo ni a, engkim kha a nuam a ni ber, kan hlim em em vek mai a.
Kan nausên tet lai, kan nun nawmlai, kan thawven hunlai, engmah engto (rilru leh ngaihtuahna lama kan la neih hma) hauh te khan nun hi a nuam a, a zalêna nun a kim bik hliah hliah a, chow kán a, krismas kan urlawk ve thin te kha a hlu a, khatih hunlai kha ka ngai thin hle mai. Kohkir theih chang se aw…
Nunhlui tahna:
Bar thla a rawn de tan a, ka rin leh beisei lawk ang deuh chiahin luikawr kam leh lirthei tlanna kawngpui kam velah Lailen leh Pitte ten an mawng an rawn su leh dep dep a, ka thlira ka thlir nawn fo thin. Tun hma khan kan inhuana kan Chhawhchhi hmunah te khan Lailen leh Pitte an rawn tum fo a, ka nu Susuma (hei hi thei tui tak ani a, a rah tam thin hle) phunna bula kan tuichheluanna-a tui te kha rawn tlanin an inbual a, an inchhaih vel thin te kha hmuh leh thlirnin a har thin a sin aw. Ka nu, khatih hunlai te kha ka ngai thin a sin…
“Hun leh ni te an her liam zel a, Sikni êng mawi alo lang leh ta; Pârmawi tin an vul, sirva lungrual nen, Lal pian hmuah zai an rel em nit”
He hla thu, nung leh lairil khawih det tu, Pu Roliana Ralte phuah hian he hunpui, masi boruak ah hian min va vel nasa em. “Pâr mawi tin an vul, sirva lungrual nen, Lal pian hmuah zai an rel em nit” a dik a ni, ka chhan sak mai ani ang chu — Lal pian hmuahzai an rel chiang a, an rel a ni, tih hi…
Hun pui a lo thlen hian:
Ni e. Mitin te nghahfak, krismas hun duhawm leh ropui tak mai, kan Lal Isua Krista Pianni champha a lo thlen te hian, engemaw ti tak hian ka thau ah min man ah, a pianna lam hla han zaitirte hian min vel a, kan mit sulha thinlung lairil hi a no leh thin a.
Kan naupan laia kan thian te, zirna hmuna kan chhar thar kan thianthate ngei pawh, a then rihsang mual minlo liamsan a, a then te erawh tuanna tlangte dangin fanau maltluan chawiin karhla dan vangkhua-ah an kawpte nen (an hmangaih lungdi te ka tihna a ni ber) hun tha leh hlimawm an hmang a, tu dang an ngai tawh lo a ni ber fahmiang i.
He hunpui, krismas ah hian zawng, “Ni rei lo te hi, rei tak kan hmang a…” nun hi lawmna tuifinriat anga thuk turin kan hmanhlel a, kan hringnun hian a tlin si lo, nun hi hausakpui mai lovin, nun hi thawnthu tha mi ah ziak zawk mai ila, kan va nihlawh dawn tak em!
Pawi ta ber nia ka lo hriat fo a chu, kan nun khuarei ala chang tur hi a ni a. Khuarei kan nun hi tlo ber tura kan ziahzel te hi ala tangkai deuh deuh deuh zel dawn niin alang, tlo turin fei ila, fei turin damrei hauh tlat ila a tha ber mai awm asin.
Chhungkim lai ni te:
Chhungkaw kima krismas kan urlawk lai te, December ni 24 leh December 31 ah te khan Masi/kumthar chhang, chhangban (ka nu huaihawtnain kan deng fo thin a) kan deng a, a chhangkhãk ang te khan kan deng bawk lah tak a, a hlimawm thin a sin aw. Ka nu ina kan ei atana Chhangpai a hran liau liaua min siamsak lai te kha a va ngaihawm thin em, ka nu i zarah kan puar theih si zia te kha aw. Nu, theihnghilh a va har em! Ka hrereng tawh anga a thi leh tawh ngai lo vang. Ka nu, ka lung aleng thin mang e.
Krismas pâr:
Sahmulphah thla a rawn inherchhuak a, ka nu, kan inkawta hmana kan phun dun, kan Krismas pâr te kha hei a rawn kuhmum tan a, a then a rawn pâr chhuak asin. Hei, ka en a, ka thlir a, ka khawih a, ka chul a, tui ka pe a sin. Nu, a va lunglenthlâk em!! Tunah chuan khua hmunah kan awm tawh si lo, a hlu in a ropui mang e—kan ‘Masi pâr’ te hi tirawt! Thu lah hi nung takin a sawi tam reuh tawp a…
Ka nu, ka lung a leng:
Sikni êng mawi, boruak thiang rimtui leng vel te a rawn zamthar a, hnar han len ila a rimtuina lairilah a cham, aw, thlasik kan nghah lawmna krismas tihlutu chu i va ni chiang em.
Zing vartian ah heti ang hla hi hmetchhuakin kan zaitir leh mai a ni ang chu—
“En teh, a lo her chhuak dawn ta,
Mitin tana hlimna tur chu;
Fam ngai, khawhar, mangang te Lalpa,
Min hnemin min awmpui ang che.
Theih chang se chhungkim lungduh te nen,
Lal pian cham lawm ka nuam e;
Suihlung ruala hlimzai vawrin/tlaikhua varin,
Thinlai ruk lawm a kim ngei ang.”