- Dr. C. Lalengkima
Khawvel hun pui, Mizoten nuam kan tih leh kan nghahhlelh em em mai Krismas kan thleng leh dawn ta reng mai. Khawnge Mizo ten Krismas kan lawm dante inthlir zau dawn teh ang.
Zoram khawvel tinghingtu Krismas: Thla an sik a, khawlum chhembo a an awm a, boruak an vawh chho hian chuan Mizote rilruah chuan Krismas a lo lang thuai a. Krismas lawm turin Zofa tlang tinreng a mite chu kan phu suau a ni ber mai. He hun pui hian Mizo mipuite hi min ti phawklek a, kan Zoram khawvel hi a nghing lawih a ni ber mai. Mizo tawh phawt chuan a rethei hausa, thingtlang chengkerh atanga khawpui thleng hian mahni khua leh veng lama Krismas hman loh hlauvin kan rilru kan seng a. Krismas tluka mahni khua, veng lama haw runpui hi kan nei kher awm love. Inthlanah hian mahni khua lama vote thlak tura haw runpui ang deuh chu kan nei ve thin a, mahse, Krismas tluka mahni khua a haw kim hi kan nei ngai awm love. Officer atanga miin a inhlawhfa a awm te, sipai te, zirlai, an thawh em em pawh kan hriat loh te, foreign lam atanga vairam leh thingtlang chengkerh ber atang te in kan haw khawm nguah nguah mai chu a nih hi maw. December thla tir atanga thla tawp thleng a haw tawk lah bo lo. Sap hla in “I’ll be home for Christmas( Krismasah chuan in lamah ka haw ve ngei ang) tih hla ang deuh hian mahni veng leh khua ngeiah, a khua te leh lian, changkang emaw changkang lo emaw mahni hmun ngei a hman loh hlau hian kan phu suau suau a ni ber mai.
Chumai a ni lo, he hun puiah hian sumdawng lian ber atanga zan lama ar bawp zuarte thlengin hlawk pui ngei tumin kan inbuasaih a. Zan dang a tam tehlul nen, thlasik khawvawt pawh zan dang a tam leh dawn tehlul nen Krismas hnaih dawnah lo chuan ar bawp kan thutpui peih lova, Krismas a zo a, zuar zui pawh lan awm leh mang der lo te hian Krismas kan ngaihlut zia a tilang chiang viau awm e. Tlang hrang hrangah hlimhlawp bawlna kan siam a, naupang lawm atanga puitling lawm, Carnival, Fair leh Concert tih vel a ri sup sup a, Picnic leh Advance Krismas nen December thla hi chu kan her liam a ni ber mai. Kawn chei thawm te, zan hawklak leng mai mai tawkte nen he hunah hi chuan Krismas denchhen hian hlimna leh lawmna hrang hrang hian kan rilru a luah khat chu a ni ber e. Krismas kan lawm zo a, kum thar kan lawm zawh meuh chuan khua a vawt renga tumah kan sahawk leh tawh miah lo nia. Hetiang taka kan lawm leh kan hlimpui kut pui hi, khawvel thil tak pawhin, a dang hi zuk awm ve miah lova.
Mi tin nghahhleh Krismas: Krismas hi Kristiante chauh hian kan lawm a ni lo va, khawvel hian an lawm a ni e an ti thin. Khawvel tana lo kal Lal hi khawvel mite hian lalah pawm ve chiah lo mah se, khawvel tan lal a nih zia tarlan nan khawvel hian a piancham ah meuh hian chuan an lo lawm a ni ber e. Kohhran mite chuan Biak inah programme te siam in an hmang a, ruai nen hlim takin an hmang a. Thil mak deuh chu he hun pui hi Kristian tak leh kohhran anga hmang ve peih miah lo pawh hian mi lawm thawm ah hian krismas leh a behbawm hi nuam an lo ti in an lo hlim pui ve em em thin nia. Zoram khawvel hian Krismas lawm tura mitin an buai karah hian, krismas thil leh a behbawma buai ve miah lo, inkhawm pawh inkhawm peih lo, ruai pawh theh peih lo, mahni in lum atanga ralkhat thlir a lo thlir te pawh hian krismas hmang tura an insingsakna leh an buai suau suau karah hian hetiang boruak vel hi nuam an lo ti ve em em a. Inkhawm thawm te, zaikhawm thawm te, ruai theh ri te zawng zawng hi a takin tel ve peih lo mahse nuam an lo ti viau zel a ni. Heng ho hian ruai an theh ve peih pawh a ni lova, an inkhawm ve peih pawh a ni miah lo, mahse miin Krismas an lawm thawmah hian he hun pui hi an lo nghahhlel ve em em ringawt nia. Hengte hlei hlei hian Krismas ropui zia a tarlang. Covid laia krismas lawmna an reh duh khan heng ho hi an nungphung a buai ve lo. Mahse, Krismas boruak reh kha chuan heng te thleng thleng hian nuam zuk ti bik chuang lova.
Chapchar kut leh Krismas : Mi thenkhat chuan Mizo thalai zingah Krismas aiin Chapchar kut hi nuam ti zawk an tam tawh ang ten an sawi thin a, nuih te lam lam hi a za thin. Tu te emaw khawvel taka nawmchen duh, sakhuana ngai thei lo, an duh dan taka krismas lawm thei lo thenkhat hian Chapchar kut te hi sawi ropui an tum vel mai mai a ni awm e. Krismas hi Mizote tih ropui a ni lova, khawvel hian nuam a ti a, an hlim pui a ni. Kristian taka rau tak lawm thei lo pawh hian nuam an ti viau a ni. Tin, krismas nawmna ber pakhat chu kan lo urlawk nasa a, kan lo hmuah nasatna hi a ni. Thlasik khawvawt surh hi Krismas nen inzawm anga sawiin, Krismas rim a nam ti ten kan sawi thin. Krismas hian rim a nei lova, khawvawt pawh hian rim hran a nei lo, mahse thla a lo sik hian krismas lam rilruin a hawi avangin Krismas rim nam ang ten kan sawi mai thin a ni e. Hetiang taka kan urlawk avang hian krismas hi kan ngaihlu a, nuam kan ti thin. Chuvangin, hetiang taka kan urlawk hi hman nawm loh kan hlau a, ringtu tha tak nilem lo, khawvel mite pawhin khawvel thilin nuam taka hman an lo tum bawk thin. Krismas urlawk zan phei chu Mizote khawvelah a aia nuam leh chuang awm lo tur khawp kan helhhawlh thin a ni a. Hmannawm loh kan hlauh lutuk avanga sual tihna remchanga kan hman nasat ber pawh a ni hial awm e. Hetiang taka kan hlut leh nawmchen pui zan hi a awm chuang lo. Chutiang taka chen tumte chuan an chen theih loh avang sawi hnawm an tum deuh mai mai a ni e. Chapchar kut, zan khat emaw lek zalen deuh a lo lawm thin nena tehkhin chi chu a ni lo deuh a ni.
Hmanlai Krismas kha: Krismas kan sawi hian hman lai deuh a Krismas kha nuam kan ti deuh vek thin. Mi thenkhat chuan khatih hun lai kha chuan lawm tur te, hlimpui tur te avanga Krismas kha kan tan chuan a hlu bik a ni, tunah chuan keimahni tawka hlimpui leh lawm tur hi kan ngah ta lutuk vang a ni ber an ti. Hei hi thui tak chuan a dik ve awm e. Mahse, tun hma lama Krismas an hman nawmna kha thil dang vang a ni lova, Kristian taka an lawm thin vang a ni. Tun hma chuan Krismas te kha an ngaihlu a, an inkhawm tha a, lengkhawm te an uar a, hla te an rem mawi bik a, ruai theh te an tam thin avang a ni. Thil chu a nih tur anga tih hian a fel mai a. Football chu pet tur a ni a, lo ben talh kan tum hian a buai a. Volley ball chu ben tur a ni a, kan pet fo chuan thil a buai thin ang hian Krismas pawh hi Kristian te hun pui a ni a, Kristian taka lawm mai hian a nuam ber. Chapchar kut hi Mizo takin hmang ila a nuam mai a, tih tunlai viau kan tum chuan a nuam tawh lo. Krismas pawh hi khawvel thil leh changkang deuh aiin Kristian takin lawm ila, a nuam mai a, kan hlimpui thin. Inkhawm tha ila, leng khawm uar ila, ruai te hi tha takin theh vek ila nuam kan ti ngawt ang. Mahse, tunah chuan kan duh duh in kan hmang a, khawvel thil takin kan hmang nasa lutuk a, a nuam kan ti ta meuh lo a ni. Chuvangin, tun lai khawvelah pawh hian Kristian takin, rau takin Krismas hmangtu te hian Krismas chu an hmang nuam ber ngei ang.
Khawvel changkanna hian hlimhlawp leh nuam dang hi min pe zel a. Chutiang karah chuan Krismas pawh hi ngaihlut a hlawh lo deuh deuh anga sawi a ni thin. Nia, he hun pui aia zalen, hei aia hman nawm theih thil hi a lo chhuak fo mai thei e. Mahse, khawvel chhandamna tura Pathianin a fapa a rawn tirhna hi chu khawvel pumpui tan a nih miau avang hian Krismas hi chu a chuai tak tak dawn lo. Kan lawm dan leh kan hlimpui chin chu danglam thin mah se khawvel chhandamna tura thilpek a dawnna hi khawvel hian a hrereng ang a, a lawm ve fo tawh dawn a ni. Hei hi Krismas ropuina tak te pawh a ni awm e. Mizote rilruah ngat phei chuan Krismas hian thuk takin awmzia a neih avang hian nuam ti leh hlim taka hmang turin krismas te kan ngaihlut a, kan ngaipawimawh a, Pathian duhdan taka kan hman zel pawh a tul hle awm e.