Tyson Fury chuan an intawn nawnna turah a nihna dik tak a lang dawn a, heavyweight title pathum kawl mek Oleksandr Usyk a tukdawl dawn tih a sawi.
Riyadh, Saudi Arabia-ah inrinni zan khian a vawi hnih nan an inhmachhawn dawn a, May 18 khan inhnek tawkin Ukrainian fighter Usyk chuan split decision-in Fury a hneh a, heavyweight huanga kawnghren pali pawm a nih hnuah kawl kim hmasa ber a nih bakah, 2000 champion Lennox Lewis-a hnua heavyweight undisputed champion hmasa ber a ni tel bawk.
Professional boxing a luh chilh atanga Fury-a tlawm vawi khatna a ni a, an intawn nawn lehna turah rin hlawh lo zawk ni mah se kum 36 mi British fighter chuan Fury hi upa tawh mah se a hunah tak a nihna a lantir dawn a, inrinni zanah a hmaa ding tur hi nuai chimih a ni dawn avangin chhinchhiah zui a ni ang, a ti a, engkim chhuhsak vekin a awm dawn a, a hmelah a lang chiang hmasa ber ang, a ti bawk.
Vawi 36 a inhnek tawhah tum 34 chakin vawi khat a inhnehtawk a, a tlawm nawn a nih chuan Fury-a tan title chhuhsak lehna tur hun tha a awm tawh lo mai thei a, a chhan chu an intawn hmasak ang khan inhnek nawn lehna tur thuthlung an ziak tel tawh lo a ni.
Kum 37 mi Usyk chuan professional a luh chilh atanga vawi 22 a inhnek tawhah hnehna a chang vek a, Fury a hneh hnuah WBA, WBC, WBO leh IBF kawnghren kawl zui mah se IBF lamin ruahmanna dang an nei a, Fury nen an intawn nawnna tibuai thei turin inhnekpui ngei ngei tur an chhawpsak a, a zawm theih loh avangin champion kawnghren an chhuhsak a ni.
He IBF title hi Daniel Dubois chuan rochun mekin ani hi August 2023 khan Usyk hian round kuanaah a knockout tawh a ni.