Halpuah leh halmawi hal lo tura hriattirna tihchhuah reng a ni a, sorkar pawhin khauh taka kal a tum thu hriat zel a ni bawk. A lawmawm hle.
Hetih lai hian khawii lai emawah chuan an lo chhekkhawl hnuk reng mai thei a, hralh tur leh hal turin an lo inruahman chho ve mek mai thei bawk. Heng zawng zawngte hi report thei apiangin report mai ila, report an dawn apiang hi sorkar pawhin bawhzui nghal mai se, thuneitute pawhin chet lak chak zual se a duhawm hle.
Central YMA pawhin an branch hrang hrangah khapna leh ti lo tura ngenna an chhuah chamchi a, zawm ngei hlawh bawk se a tha hle. Chutihrual chuan a bawhzui kawngah mawlh hian chet chak a tul dawn viauin a lang.
Nimin khan hemi chungchangah hian home minister pisa-ah inkhawmhona neih niin, halpuah leh halmawiin hriselna a tha lo zawnga a nghawng nasat thu leh tul loa sum leh pai khawhralna a nih thute sawi a ni a. Halpuah leh hal mawi khapna chungchanga sorkar hmalakna hrang hrangte sawiho niin khapna thupek bawhchhiatte man an nih dan leh an laka dan anga hmalak chhunzawm a nih dante sawi a ni bawk.
Aizawl District Sr. SP pawhin Krismas leh kumthar vuakveta boruak muanawm tak a awm theih nana hma an lak dan tlangpui nimin vek khan thuchhuah a nei a, man an neihte chu jail-ah an dah zel thu a sawi bakah, khauh an tum thu a sawi bawk.
Thlirlawkna leh insawi khauh tumna ngawt hi a tawk zo lo a, kumdang aia khauh ngei tur leh hma la zui tak tak ngam turin sorkar hi che ngam se la, boruak muanawm tak leh thianghlim tak hnuaia hunpui kan hman theih nan thuneitute pawh che chhuak mawlh teh se.