Aizawl: Thingdawl Agriculture Farm-ah lei (soil) tel lova alu chi thar chhuahna (Aeroponic System of Potato Seed Production) chu Agriculture Minister P.C.Vanlalruat’’n nimin khan a hawng.
Hawnna inkhawmah PC Vanlalruata chuan, a hawn tak an project chu Agriculture department tana rahbi ropui tak a nih thu a sawi a. Alu chi tha an thar thei zel a nih chuan alu chingtuten alu chi tha an indaih lohna nasa takin a phuhruk sak dawn a, an hlawkpui hle dawn niin a sawi.
PC Vanlalruata chuan an project hawn tak chu Agriculture department mai ni lo vin, Mizoram tana mel lung phunna pawimawh tak pakhat a ni a. Amaherawhchu, a khawl leh hmunhma te peihfelin awm mah se, a thawktuten an enkawl that loh chuan an tum angin hlawhtlinna an hmu dawn lo va, chuvang chuan a thawktuten an vei a ngai takzet a ni, a ti.
He hunah hian Deputy Speaker Lalfamkima khualzahawm niin thu a sawi bawk.
He huna tar lan a nih danin, NEC atang hian he Production Unit atan Rs nuai 198 sanction a ni a. Project hna thawktu hi Blue Stallion Equipment (P) ltd, Ludhiana an ni. Thingdawla Aeroponic System hmang hian kum khatah season khatah alu chi (mini tuber) nuai 2.5 thar chhuak thei tura beisei a ni a. Kum khata season hnih an kalpui thei a nih chuan chi (mini Tuber), nuai 5 lai thar chhuak thei tura beisei a ni bawk.