Lalrinchhana Sailo laka title a humhim hnuah Lalsangliana’n chawlh mai a tum lo va, Mizo Palian Inchai champion zawn rei tur nih a tum.
Nilaini liamta zan khan LPS Arena, Falkland-ah Upper Republic chhuantawlawl Sangliana’n thawh sawm an inchai chhungin amah chotu North Vanlaiphai tlangval Chhan a hneh a, Palian title a chuh tawha a chak nasat ber niin vawi sawm chhiar thlengin tum thum a bawhbet a, point 66 thawk chhuakin lehlamin a hmu ve lo a ni.
Title chuha vawi li a inchai tawha awlsam ber a nih rualin a harsatna lai a awm tih kum 33 mi Sangliana’n sawi a, inveng leh tawlh kual chunga lehlamin a khelh nasat avangin thiamna leh theihna hman a har a, chawi kan a tumna pawh a puitlin thei lo, tih a sawi.
December 22, 2014 kha Palian title a chuh hmasak ber a ni a, champion lai Lalnunfela chawi kangin a hneh a, 2016-ah amah chotu PB Lalnienga pu kangin a bawhbet bawk. November 2022 khan title lak let tumin Fela a kir leh a, inbawhbeh pangngai awm lovin Sangliana’n a hneh nawn a ni.
December 20, 1988 khan R Vanlalduata’n champion lai Chalchungnunga a hneh a, April 2, 2003 kha a inchai hnuhnun ber niin Saidingliana Sailo a hneh nawn a, kum 14 leh ni 102 chhung title a humhim hnuah a beih apiang hneh vekin a chawl a, title chuhin vawi riat a inchai a ni.
A kalsan Palian Inchai title hi kum khat hnu April 2, 2004 khan Saidinga’n C Lalengmawia hnehin a rochun a, Duata champion hun chhung hi kum 15 chuanga chhiar theih a ni a, March 3, 2002 khan Saidinga nen an intawn hmasak tumin vawi sawm chhiar thleng tum hnih bawhbetin a awm a, a inchai chhunga bawhbet a tawrh awm chhun a ni.
A champion tirh atangin Sangliana’n kum 10-na a hmang mek a, chawlh mai a tum lo a, hriselna tha a nei a nih phawt chuan champion ropui Duata aia rei title humhim a tum tih a sawi.
Hnuhma ropui zawk hnuchhiah turin a beih apiang a la hneh vek bakah tute mahin an la bawhbet lo a, mahse, kum nga dang title humhim zui theih erawh a awlsam dawn lo tih sawiin, kum 38 a ni thlengin champion kawnghren a hren a ngai dawn a, a champion tirh kum 10 kal ta khan kg 104-a rit a nih laiin tunah kg 121 a ni tawh a ni.