Aizawl: Aizawl District Sr SP chuan Krismas leh kum thar vuak vet boruak tha tak mipuiin an hman theih nan leh an himna turin hriattirna leh ngenna thuchhuah a siam.
Nimina a thuchhuahah, Aizawl District Police te chuan dan leh thupek kenkawh hna ngawrh takin an thawk mek a, sorkarin halpuah leh halmawi zawrh leh hal a khap tlat bawhchhiate chu kum khat thleng lung in tan emaw, Rs 5,000 thleng chawitir emaw, a pahniha hrem kawp theih an nih thu tar langin; Police-te dan leh thupek kenkawh kawngah thawhpui turin mipui an sawm
Thuchhuaha tar lan danin, Aizawl District hnuaia Police Station hrang hrangte chuan khapna thupek bawhzuiin theihtawp chhuahin halpuah leh halmawi zuar leh kawI dap hna a thawk mek a. Dawr, kudam leh lirthei hrang hrangte check thin an ni a, transport leh courier service-te pawh endik zel an nih bakah, online-a zuar thinte pawh theih ang ang a chhuizui an ni bawk.
Tun dinhmunah halpuah leh halmawi man tawh zawng zawng hlut zawng hi Rs. 21,35,555 man hu a ni a. Thubuai pasarih ziah luh tawh niin mi pasarih man an ni a. Jail-ah dahluh vek an ni.
Hnuchhui kawng a Police-te tha tichak tur a pui duh te tan, dan bawhchhe lai thlalak emaw, video record emaw nei chuan Aizawl PS (8794747291), Bawngkawn PS (8794747292), Vaivakawn PS (8794747293), Kulikawn PS (8794747294) leh Zonuam OP (8794747295) ah te Whatsapp a thawn emaw, tawngka a report pek theih a ni.
December 21, 2024 atangin Aizawl khawpui chhunga veng hrang hrangah Police-te zanah an duty dawn a. A tul huna rang tak a che chhuak thei tur Quick Response Team (QRT) atan Aizawl khawpuia Police Station hrang hrang paliah Police dah belh an ni dawn a. Heng bakah Police patrolling tihchak a ni bawk dawn a ni. Krismas leh Kumthar vuakvet a bazaar kal harsatna tawkte tanpui turin Israel Point, Bara Bazaar leh V. Lalliana Point, Lower Zarkawtah te Police Help Desk siam a ni dawn bawk.
Aizawl Police chuan lirthei khalhtute dan zawm a, mipui himna tana hlauhawm leh harsatna siam lo tur leh, zu leh ruihtheihthil dang rui chunga lirthei khalh lo turin a ngen a. Khawlaia rui chunga lirthei khalhte endik a ni dawn a. hmun hrang hrangah barricade siamin Police Duty dah an dah dawn a ni.