Aizawl: Aizawl West-II bialtu MLA Lalnghinglova Hmar, Sports/Excise Minister ni bawk chuan a bial chhunga Mizoram Upa Pawl branch hrang hrang office bearer-te chu MINECO, Aizawl-a a office-ah thingpui inpaha inkawmhona hun a hmanpui.
Lalnghinglova Hmar chuan kuminah vanduaithlak takin kum lama naupang zawk thahnem tak vuiliam an ni chu pawi a tiin, kum tawp tluang taka thleng a, inkawmhona hun an hmang thei hi thil lawmawm a tih thu a sawi.
Excise minister ni bawk, Lalnghinglova Hmar chuan ruihhlo tihrem tumna kawngah hma an lak zel thu sawiin, a bial chhung bikah pawh vengchhung mite thahnemngaihna avangin hma an sawn tih a sawi a. Ruihhlo dona kawngah MUP te chu theihtawp chhuahpui turin a sawm a. Kalkhawmte hian ruihhlo do chungchanga an ngaihdan leh rawtna bakah an vei zawng hrang hrang te sawiin, kumthar lama bial chhung MUP te’n zin khawthawn hun an hman dan tur an sawiho bawk.
Aizawl West-II bialtu MLA hian a bial chhunga MUP Office Bearer te hi an inkimin puannuam a hlan nghal a. Anni bakah hian a bial chhunga kum 80 chin chung lam hnenah pawh puannuam hi a pe theuh a ni.