- Dr. C. Lalrampana
INTERNET HMANSUAL HLAUHAWM -Dr. C. Lalrampana
A KAMKÊUNA
Internet hi “Khawvel pumpui huapa khawl thluak nei (computer) hmanga hriatna maimawmril awmze nei taka inzam a ni a, chung hriatna inthlunzawm nana hmanraw pawimawh leh tangkai tak takte chu: network, computer, server, phone leh smart appliances te, transmission control protocol (TCP) standard hmanga inbiakpawhna leh hriattirna (information) leh file-te inthlengtawn zung zung theihna tur, service chihrang hrang nena thlunzawmna hmanraw tangkai tak a ni” tiin hrilhfiah ila a dik zawber mai awm e. hriatna maimawmril (Internet) hian hlãwkna tam tak a nei a, hringnun khawsak kawnga samkhaina kawngpui sialtu lamtluang kawng pawimawh tak leh chhenfakawm tak a ni. Hetiang taka tangkai leh chhawnaawm tak hi ni mah se, a tha lo zawngin kawng hrang hrangah hman sual theih a ni a, cheng tam tak chawi theihna leh lung ina tan theihna a ni bawk. Chuvangin, mitinte hi kan fimkhur hle a ngai a, thenkhat tana dam khawchhuahna hmanraw pawimawh tak a nih rualin thenkhat tan erawh lungngaihna chirhdup hmuna tlakluhna khuarkhurum mawng neilo leh tahna thlentu, kumkhuaa chawr chhuah tawh lohna tura hringnun kalsiam daltu hlingbawn a ni thei bawk tih hre rengin fimkhur taka hman tangkai theuh ni se kan zavaia thatna leh malsawmna hnãr a ni ngei ang. Hetiang hi a nih avangin internet awmzia leh a tangkaina te, a hlauhawm theih dan leh fimkhur a ngaihna laite kan hriat chian lehzual theih nan tlem thlir zau lawk teh ang: INTERNET AWM TAN HUN Internet hi January 1, 1983 atanga bul tan nia ngaih a ni a, chutih lai chuan ARPANET leh Defence Data Network-te chuan official takin Transfer Control Protocol/Internet work Protocol (TCP/IP) standard an hmang a ni. Hei vang hian network hrang hrangah computer hmangin a inbiak pawh theih phah ta a ni. Internet chanchina thil thleng pawimawh thenkhat chu hetiang hi a ni: Advanced Research Projects Agency Network (ARPANET) hi 1968 khan a lo piang a, scientific leh academic network hmasa ber atan din a ni a. Packet-switching network hmasa ber hi 1969 khan a lo piangleh a. California-a research team pahnih chuan message an thawn thei ta a ni. Kum 1974 khan Computer scientist Bob Kahn leh Vint Cerf-te chuan TCP/IP an siam chhuak a, chu chuan computer-te inbiakpawhna a siamsak a ni. Kum 1981 khan CSNET hi a lo piang a. CSNET hi National Science Foundation-in sum a pek a ni a, online-ah a lut a, university hrang hranga computer science zirchiangtute a thlunzawm a ni. NSFNET hi 1986 khan a lo piang a, National Science Foundation-in sum a pek a ni a, online-ah a lut a, supercomputer-te a thlunzawm a ni. CERN hi 1993 khan a lo piang a. CERN chuan World Wide Web source code chu royalty-free basis-in a siam chhuak a ni. Kum 1994 khan IWWWC a lo piang a. International World Wide Web conference hmasa ber chu CERN-ah neih a ni. Internet service chak zawk siamna hmasa ber chu digital subscriber line (DSL) a ni a, hei hian internet signal chu phone line awmsa hmangin a phur a ni. Internet lo pian atangin kum 41 zet a liam ta mek. Internet service changtlun sawtzia leh khawvel a pawh zim tawhzia te, ram hla tak takte inkara hriattur pawimawh leh chanchin tharlam ber ber a chhawp chhuah hnaih tawh dante leh khawvel ram hrang hrang khawpui mawi tak takte tualchaina khawlai dung leh vangte chu kan thutna pimdan leh mutna pindan, ei rawngbawlna pindan leh pindan hrang hrangah Mon tlrawn chhawpchhuahsak thei tawh a, heng zawng zawng, kawng tinrenga samkhaina min rawn thlen dan ngaihtuah hi chuan vanram nun aitecheu kan chên ta mek ni berin a lang.
INTERNET PAWIMAWHNA
Internet hian thatna tam tak a nei a, chungte chu tlema zawng i han bih zuai teh ang: a). Inbiakpawhna: Internet hmang hian khawvel hmun hrang hrangah midangte nen email, messaging apps, social media, leh video conferencing hmangin kan inbiak theih phah a, hmaihmaa inhmachhawn ang maiin kan duh leh mamawhte kan duh hun hunah kan inhrilhtawn theih reng phah ta a ni. b). Intihhlimna (Entertainment): Internet hian intihhlimna hmanraw chi hrang hrang a keng a, movie, TV show, music leh game-te leh thildang tam tak a keng tel a, mahni chauha awm pawha min awmtleitu hmanraw tha ber leh tangkaiber a ni. c). Thu hriat theihna: Internet hian thupui eng pawh, chhiat that tawh ilo chungchangah thupui tam tak leh chanchin thar ber ber chu a rang thei ang bera hmuh theihin a phochhuak thei a ni. Thuruk vawn kawngah leh bengvarna kawngah a tangkai hle. d). Zirna: Internet hian online course hrang hrang-Web development; Mobile development; Game development; Entrepreneurship; Business analytics and intelligence; Finance; IT certifications; Introduction to mathematical thinking leh a dang tam tak a zir theih a ni. e). Chhungkaw inhnaih tir: Internet hian chhungkua a hnaih tir thei a ni. Khawvel hmun hrang hrang leh ram hla tak taka awm, kan chhungkhat laina leh laichinte nen inzinpawh reng thei lo mah ila mahni awmhmun theuh atangin social media platforms hrang hrang hmangin hmun leh hmuna inbiakpawh theihna inkawmnelna siam theitu a ni. f). Sawrkar rawngbawlna mumal zawk: Internet hian sorkar rawngbawlna a ti samkhai thei hle. Mipui mamawh hrang hrang phuhruk nan Pisa chhuahsan kher ngai lova hriattirna theh darh leh fawmkhawm kawnga hmanraw tha ber leh sawrkar inrelbawlna tiawlsamtu ber a ni. g). Complexity tihziaawmna: Internet hian complexity a tiziaawm thei hle. Entir nan-Civil War, Inlaichinna: nu leh pate nena in inzawmna, Thil chi hrang hrang hmanga siam broth te, Software: Cognitive complexity, chu code hriatthiamna atana rilru lama thawhrimna te, Algorithms: Constant complexity te, Code: Cyclomatic complexity te, Pawl hrang hranga thil buaithlak takte chinfel theihnate a keng tel vek a ni. Heng bak pawh hi Internet tangkaina leh pawimawhna tam tak a la awm.
A THATLOHNATE
a). Cybercrime: Internet hmang hian dan lova thil tih, hacking, identity theft, leh online fraud-te hman theih a ni. b). Thu dik lo: Internet-ah hming hriat loh hmang hian thu dik lo leh belhchian dawllo tam tak theh darh theih a ni. c). Cyberbullying: Internet hi cyberbullying leh thil tha lo dang dang tam tak atan hman theih a ni. d). Ram venhimna: Internet hman dik loh hi ram venhimna atan lu tuhaitu leh chhiatna thlentu a ni thei. e). Cybercrime: Computer hmanga thil sual tih, hacking ang chi tam tak a tih theih. f). Cybersex trafficking: Mipat hmeichhiatna lama nawr luih emaw pawngsual emaw a thlen thei. g). Internet-a tualthahna: Online hmangin tual thahna rapthlak tak thlen theih a ni. h). Malware: User computer tichhe thei tura siam software, computer virus-te pawh tichhe thei tura siam a ni. i). Spamming: Duh loh advertisement thawn chhuah theih a ni. j). Identity theft: Mi pakhat identity ruk chhuah theihna hmanraw tha tak a ni. k). Internet addiction: Internet chu tlanchhuahna atan emaw, rilru lama harsatna atanga reilote chhunga chhanchhuahna tur emaw atana hman theih a ni. l).Social isolation: Online-a hun hman tam lutuk hian nun tak tak nena inpawhna leh mahni chauha awm theihna a tihluar thei a ni. m). Connected device hmanga tihduhdahna: Abusers-te hian connected devices te chu mi pakhat enfiah nan, tihbuai nan, isolate nan emaw, thil dangin emaw tihchhiat nan an hmang sual thei a ni. Cybersecurity lama hmalakna tha ber berte zawm turin kan fate chu scam tlanglawn chungchang zirtir fo tur a ni.
A TLÃNGKAWMNA
Mizoram Police CID Crime hnuaia Police Cyber Crime Branch Report hnunung berin a tarlan danin kum 2021-Dec. 5, 2024 thleng khan Mizoramah internet hman sual avangin mi 38 thiamloh chantir (convicted) an ni tawh a. Kumin 2024 chhung hian thubuai 39 ziak lut tawhin, mi 26 man an ni tawh bawk a; heng zingah hian kumtling lo mi 6, charge sheet tawh mi 14, thubuai ngaihtuah mek mi 14, chhui mek mi 19 an ni a. Account hrang hranga sum hmuhlet tawh chu cheng nuai 39 leh 74,863/- a ni. Tin, account hrang hranga sum hrensak nuai 15 leh 31,100 a awm mek bawk. Internet hmansual kawnga harsatna tam ber chu sum kaih hnawiha inbumna leh, hur sualna lam hawi te, social media platform hrang hrang hmanga mi tihbuaite pawh a tel a ni. Internet hi a tangkai zawng leh tha zawnga hmanraw tangkai tak a nih rualin a dik lo zawng leh tha lo zawnga hman sual (misuse) chuan hmanraw tha lo tak leh hlauhawm tak a ni tih kan hriat tharleh theuha kan fimkhur lehzual a pawimawh hle. Tunhnai khan ABC News chuan Trump-a’n network laka hmingchhiatna thubuai a siam chu chinfel nan President thlan thar Donald Trump-a presidential foundation leh museum-ah dollar maktaduai 15 chawi a remti a, hei hi Dec. 13, 2024 zirtawpni khan U.S. District Court-a document thehluha tarlan a ni. Trump hian ABC News anchor George Stephanopoulos chu “malice tak tak emaw, thudik ngaihsak lohna nei emaw” tiah a puh a, hei hi March 10-a Republican Rep. Nancy M-i interview-a Stephanopoulos-a’n Trump-a chu pawngsual thubuaiah mawhphurtu nia hriat” a nih thu a sawi vangin Trump-a hian intihhmingchhiatna (defamation) thubuai a theh luh vang a ni. ABC News Anchor Stephanopoulos-a’n hetiang khawpa sum tam tham a chawina chhan hi Internet kal tlanga social media platform pakhat a hman sual vang a ni tih kan hriat a tha hle. US dollar maktaduai 15 chu a tlem lem lo hle. Internet hman sual chingho pawh hian an sim vat loh chuan sum tam tham tak an chawi hun pawh a la awm ve ngei ang. Mizote hi thil thiam chak, thil intihhmuh ching, rilru hmanhmawh leh harh vang tak kan ni. Internet hman tangkai lawngah pawh kan tangkaipuiin hma kan sawn chak hle a; Ramachandran leh intodelh zawkte neih ang apiang nei vea thiam ve nghal zung zung thei zel kan ni. chutiang bawkin Internet hman sual kawngah pawh a fingvar ber berte kan pawl pha nghal zel a, ram changkang leh khawvel hmun danga chin tha lo hrang hrang pawh la chhawng chak ber kan ni ngei ang. Mizoram Police CID hnuaia Cybercrime branch awma chin kum 3 chhung vel lek pawhin Internet hmansual vanga thiamloh chang tawh 38 zet an awm hman der tawh a, thubuai nei mek, chhui mekte nen phei chuan Internet hmang sual hi an tam sawt hle. Chuvangin, Mizo thalai leh Internet khawih thei chinte hian internet hman dan tawk kan thiama kan fimkhur a pawimawhzia hi hre thar nawnleh ila ka zavai atan a pawimawh takzet a ni. Naupang kawlhrawng & Ramenga triau trackx hla phuah Ruatfeli & Francis-te hlasak-”Duh duh dana awm hi duh loh dana awmna” an tih ang mai khan Internet thiam tak tan chuan hringnun chen dan tawk thiam a har hle ta ve ang. Mahse, mahni inthununna neih that hle a ngai a ni tih hriat a tha hle. Internet hmanga midangte nun khawih buaia mi harsatna siam zawnga mahni duh dan dana awm hi kan duh loh deuh dana awmna thlentu a ni thei tih hriain fimkhur sauh sauh zawk ang u.