Nimin khan Mizoram Chief Secretary Khilli Ram Meena, IAS hovin CS Conference Hall, MINECO-ah January ni 8, 2025-a Aizawl lo thleng tur Mizoram Governor Designate General (Dr.) Vijay Kumar Singh, PVSM, AVSM, YSM, ADC chu Lengpui Airport-ah hmuah dan tur leh a tuk January ni 9, 2025-a Mizoram Governor anga lakluh hun ‘Swearing-in Ceremony’ Raj Bhawan-a neih dan tur relho a ni.
Mizoram Governor thar atana ruat (Designate) General (Dr.) Vijay Kumar Singh chu Mizoram Chief Minister hovin Minister ruatte leh Official pawimawh engemawzat ten Lengpui Airport-ah an hmuak ang a. National Salute leh National Anthem te nen dawnsawn a nih hnuah Raj Bhawan panpui nghal a ni ang.
A tuk ni 9th January, 2025-ah Circular Lawn, Raj Bhawan-ah Governor lakluhna inkhawm ‘Swearing-in Ceremony’ chu urhsun taka hman theih beisei a ni a. Mizoram Governor thar tur hi Chief Justice of Gauhati High Court-in a lalut dawn a ni. He hunah hian Chief Minister, Council of Ministers, Speaker, Dy. Speaker, Mizoram MP te pahnih leh Officials pawimawhte bakah sawm bikte tel kim thei tura sawm leh beisei an ni bawk.