KUM HLUI DING RIH RAWH

  • Centenary C. Lalzahawma

Hun leh kum te hi mihringte hun tawn azirin kan ngaihluin kan ngaihlu lo thei a. Mi thenkhat tán kum chhiat kum nìin, ral thuai thuai se kan duh a; nimahsela, mi thenkhat tán erawh kum that kum, thil engkima bul tanna thar kan neih kum, hriat reng tlák thil ropui kan tih kum a ni a, ral mai lovin ding reng se kan duh thìn.

Kum thar vêk hi kum hlui a nih thin avàngin, lungáwi taka kum hlui kan thlah lìam theih nán kum bul kan tan dànah rilru fím kan put a ngai thìn hle. Khua rèl chhiatna avàng leh vànduaina avànga kan chunga thleng atána kan duh loh thil tha lo tam tak hi mihringte chunga thleng thìn a ni. Lei mîte chung thil thleng thìn hi Síamtu [Pathian] ruat ang zêla thleng thìn a nih rualin, kan chunga thil tha lo lo thleng te leh kan bula chêngte tána thil tha lo kan thlentír chhan tam zâwk erawh kan nun kan fimkhur tâwk loh vàng a ni fo. Kan fimkhur loh zár zovin mi dang kan tinâ a, natna tha lo kan kài chhâwn a, duh loh chung chungin beidawnna ruamah kan hnûk lût a, keimahni avàng vêkin thihna hial kan bula mîte chungah kan thlentír cháng pawh a awm thìn. Mi dang tána malsàwmna thlentu kan nih theih loh pawhin mi dangte tán harsatna siamtu nih tum lo ila. Mi dangte kan fak thei ngang lo a nih pawhin i sawisêl kher lovang u. Kum hlui thlah liam harsa titute zînga kan hming a chùan ve theih nán mi dang tán malsàwmna thlentu nih kan tum zâwk tùr a ni.

Ni khat chu pi tar kum 86-a upa hi natna khum chhuahsanin chatuan ram a pan a. Têt tê atanga hmangaih taka a lo enkawl sei len a tu leh fate chuan tawrh thiam har tìin an ui êm êm a, mittui nèn an thlah liam a ni. Kum tam a vei hnu pawh chuan hmangaih taka a lo enkawl tawhnate chu mitthláah a châm reng a, a tu leh fate chuan an theihnghilh tak tak thei rêng rêng lo mai a. Hun bîk a lo inher chhuah apiangin a thlànah kalin an tap an tap thìn. An ngai a, dinhmun rethei taka an din lai zawnga hmangaih taka lo enkawltu a pi chu dinhmun thàa an din hnu-ah a thlàn máwi taka cheisak chauh chu an tih theih a nih avàngin an rilru a na thar thìn a, an rilru chhúngril tak takah thlah liam harsa an ti thìn. Keini pawh hun tha kan neih lai hian tanpui ngaite tanpui ila, kan tána thil tha min tihsaktute chungah thil tha ti ila, kan chunga thil sual titute ngaihdam theihna nun nei bawk ila, chu chuan nun a tinuam ang a, kum hlui liam mai tùr pawh hi hreh takin kan thlam liam ve ngei ang.

‘Fam kan chang thei kum leh chuan…’ tia hla síamtu’n a sawi angin, kumina kan hun hman mék hi kan khawvêl hun hnuhnung mai bâkah kan hun tàwp pawh a nih theih avàngin ngaihdam dìl ngaiin kan tùn hun hi hmang lo ila, kan tùn hunah hian mîte thinlunga châm reng thei tùr thil thà tih i tum zâwk ang u.

Leave a Reply

error: Content is protected !!