Mizorama electoral roll ennawn thar ber chu nimin khan Mizoram district hrang hrangah tlangzarh a ni a. Mizoram pumah vote nei mi 8,69,813 an awm a. Mipa aiin hmeichhia vote nei tam zawkin, mi 4,48,925 an awm a. Mipa vote nei mi 4,20,888 an awm a; nikum aia voter punna hi 13,516 a ni.
Thawhtannia Mizoram puma vote nei tlangzarhah hian Aizawl district, assembly constituency 12 awmna chu vote nei tamna ber niin voter 2,92,115 awmin, heng zingah mipa 1,36,350 leh hmeichhia 1,55,765 an ni a, mipa aia hmeichhia an tamna chu 19,415 a ni. Voter punna hi 3,153 (1.09%) a ni.
Assembly constituency paruk awmna, Lunglei district-ah voter 1,02,304 (mipa 50,679, hmeichhia 51,625) an awm a, Lunglei district-a voter punna 1,534 a ni.
Assembly constituency pathum awmna, Kolasib district-ah voter awm zat chu 64,694 a ni a. Draft Roll tlangzarh atanga voter punna chu mi 667 niin, za zelah 1.04 a ni.
Lawngtlai district bikah assembly constituency pathum awmin voter 94,514 an awm a. Vote nei thei zingah hmeichhia tam zawkin mi 47,355 an ni a, mipa chu mi 47,159 an awm thung.
MLA bial pathum awmna, Saitual district-ah vote nei mi 56,320 (mipa 27,749 leh hmeichhia 28,571) an awm a. Khawzawl district-ah hian Assembly constituency pakhat awmna vote nei mipa 8,838 leh hmeichhia 8,959, an vaiin 17,797 an awm a. Final Electoral Roll-ah hian voter 377-in an pung a, voter punna hi zaa 0.4 a ni.
Mamit district-ah voter mipa 33,564 leh hmeichhia 32,988, a vaiin 66,550 an awm a. Vote nei punna hi 1,359 niin, zaa 2.08 a ni a. Assembly constituency pathum awmna, Mamit district chhungah hian hmeichhia aiin mipa vote nei 576-in an tam zawk.
Champhai district-a assembly constituency pathumah vote nei mi 58,657 an awm a, an zingah mi 28,594 chu mipa niin, mi 30,063-te chu hmeichhia an ni thung a, mipa aiin hmeichhia 1,469 in an tam zawk a. Vote hi 945-in a pung.
Assembly constituency pahnih awmna, Siaha district-ah vote nei mi 45,498 an awm a. Serchhip district-ah voter 55,292 an awm a, assembly constituency pathum awmnaah hian vote nei thei mipa 26,943 leh hmeichhia 28,349 an awm. Tun tum Electoral Roll ennawna Draft Roll tar chhuah aiin vote nei thei hi 634-in an pung a ni.
Hnahthial district-a assembly constituency pakhat awmnaah hian vote nei thei mi 16,511 an awm a, an zingah hian hmeichhia 8,325 leh mipa 8,111 bakah, service voter 75 an awm a ni.