Aizawl: All India Adivasi Congress Committee (AIACC) national executive member Zodintluanga Ralte chuan Narendra Modi-a sorkar chu hnam hnufual zawkte rapbet a, democracy palzuta dinhmun chhe taka awmtir pawisa lo tiin a puh.
Pathiannia Ambassa, Tripura-a Tripura State Adivasi Committee-in State Level Convention-a chief orator ni tura an sawmnaah Zodintluanga ralte chuan Narendra Modi-a sorkar chuan ‘authoritarian’ sorkar, India ram democracy dinhmun tichhe mektu tiin a puhin, “Sorkar laipuia Narendra Modi-a sorkar chuan tribal leh hnam hnufualte dinhmun nasa takin a tichhe mek a, India ram danpui nasa taka palzut a ni a, an duhdan ang leh lalna a chelh theihna tur atan te, a mi huatzawng tihthaih nan sorkar hmanrua an hmang mek a ni,” a ti.
Congress party in India ram puma hnam hnufual zawkte dinhmun theihtawp chhuaha a chawisan dante sawiin, Zodintluanga Ralte chuan hnam hnufual zawkte chenna leh an culture vawnhim zel a nih theihna turin UPA sorkar chuan Forest Rights Act kum 2006 kuma pass a nih thu sawiin, he Dan tha tak hi Modi-a sorkar chuan a kalpui duh lo va, company leh leh hausa zawkten tribal leh hnam hnufualte chenna hmun an hnehchhuh mek a, niin a sawi bawk.
Tripura-a a thusawinaah hian Zodintluanga Ralte chuan sorkar laipuia Congress sorkar zar zovin Rajiv Gandhi-a prime minister hunlaia Mizoramah remna a thlen thu kalkhawmte hnenah a sawi a. “Mizoram mai bakah Nagaland-ah pawh remna siam tumin Congress sorkar chuan theihtawp alo chhuah tawh thin a ni,” a ti.
BJP kaihhruai NDA sorkarah chuan India hmarchhaka hnam hnufual zawkte dinhmunin chhiat zual zel lam a pan thu sawiin Zodintluanga Ralte chuan, Manipur-ah hnam tlem zawkten beih an tawk mek a, BJP kaihhruai sorkar laipui leh Manipur state sorkar BJP kaihhruaite chuan he buaina hi engah mah an ngai lo niin a sawi.
“AICC hotupa ber Mallikhajun Kharge leh Rahul Gandhi ten hnam hnufual leh hnam tlem zawkte tan theihtawp an chhuah mek a, Lok Sabha inthlan leh hunah chuan Congress a sorkar leh ngei dawn tawh a, he hun hi hnam hnufual leh hnam tlem zawkten nghakhlel takin an thlir mek a ni,” Zodintluanga Ralte chuan a ti.
He convention hi Tripura Dhalai district-a Ambassa khuaah January 5, 2024 khan neih niin Sudip Roy Barma, permanent invitee, Congress Working Committee in khuallian niin a hmanpui a ni.