Aizawl: Murgan Nagar, Mumbai-a cheng, Prakash M Nadar (50) chu Mizorama thisen pe tur liau liauin a kal a, nimin khan Synod Hospital Blood Bank-ah thisen a pe a, Association for Voluntary Blood Donation (AVBD), Mizoram hruaituten an buaipui.
Nadar hi pianphunga rualbanlo (90% disable), wheelchair hmang a ni a, India rama state leh union territory tinah thisen pek tum niin Mizorama a kal hma hian state 24 leh UT pangaah thisen vawi 125 a pe tawh a. Nimina a thisen a pek hi a vawi 126-na leh state/UT 30-a a pekna a ni.
Nadar chuan mite nunna chhan nan thisen pe turin mi tin a sawm a, 90% disable person a nih thu sawiin, “Kei pawhin ka pek theih chuan i pek theih lohna tur a awm lo. Ka tum ber chu, thisen dawn tur neih loh vangin mi tu mah an thi tur a ni lo, tih a ni a, kan tanrual chuan thisen dawn tur neih loh vanga thihna thleng thin kan tibo thei dawn a ni,” a ti.
Aizawla thisen a pekna tura buaipuitu AVBD, Mizoram chungah a lawm thu a sawi a; taksa lamah harsatna nei chunga Mizorama thisen a pe thei chu a lawm thu leh a thil tih chuan Mizoram mipui, a bikin thalaiteah chona leh phurna a pek ngei a beisei thu a sawi bawk.
Nadar hi khawvel huap infiamna lama pianphunga rualbanlote intihsiakna hrang hrangah tel tawhin, lawmman eng emaw zat a la tawh a; India ram leh khawvel huapa chawimawina thahnem tak a dawng tawh bawk.