Pathian kaihhruainain kum thar 2025 kan chuang kai a, a hmasain chhiartu zawng zawngte kum thar chibai kan buk a che u.
Nikum kum 2024 chhung khan mi tam takin kum thar hmu ve phak tawh ngai lo tura vuiliam an ni a. Chung mite zingah nang leh kei kan tel lo va, hei hi kan that bik vang te, kan fel leh chak bik vang te bakah kan hausak bik vang liau liau te ni loin, Pathian khawngaihna leh zahngaihna vang liau liaua kum thar hruai thlenga kan awm hi lawmthu sawi mawlh mawlh tur kan ni.
Kum 2025 chuangkai ni ringawt lo va, he kum tharah hian rilru thar leh danglama kan awm theihna atana min buatsaihtu a lo nih beisei ila. Mahni hmazawn theuhah kan hnaah te, kan zirlaiah te, hnathawh leh thil tih theuhah thahnemngaihna nen kum bul hi tan theuh tum ila, chu thahnemngaihna chuan mimal tin nunah hlawhtlinna ropui tak min thlen ang a; chumai ni loin, chhungkaw khawsaknaah intodelhna leh hmasawnna min thlen ngei bawkin a rimawm tlat a. Kum bul atanga thahnemngaihna thinlung kan put chuan, chu thahnemngaihna chuan hlawhtlinnaah min hruai dawn a ni a. Hlawhtlinna chuan hmasawnna tlang sang takah min hruai thleng ngei bawk ang. ‘A bul tan that chu a zahve zo ang’ an tih thin kha.
Kum hlui kan thlah liam tak khan kan sualna te, kan that lohna leh fel lohna te, midang nena kan innghirngho tawhna zawng zawngte thlengin liampui mawlh sela; he kum tharah hian hnung lama thil awmte chu theihnghilh a, hma lama thil awmte chu ban tura kan inbuatsaih a tul a. Pathian duh dan anga dikna leh rinawmna vawng nung reng chunga kum bul atanga kan insanmar a pawimawh a ni.
He kum thar hian Pathian malsawmna tam tak thlen che u sela, chu malsawmna chuan kawng tinrenga hmasawnna thlen che u rawh se tih hi kan tawngtaina lo ni se. The Zozam Times chuan duhsakna tinreng nen kum thar chibai kan buk a che u.