Aizawl: Transport Minister Vanlalhlana chuan nimin khan Union Minister for Ports, Shipping and Waterways (MoPSW) Sarbananda Sonowal chu a chenna inah kawmin transport department-in Inland Water Transport (IWT) atana hma a lak mekte chu chak lehzuala thawh a nih theih nan hmalakpui turin a ngen.
Transport department hnuaiah hian IWT project pathum, Development of IWT on River Khawthlangtuipui-River Tuichawng, Development of IWT on River Tlawng (National Waterway-102) leh Development of IWT River Chhimtuipui te kalpui mek a ni a. Heng project-ah hian techno-economic feasibility neih zawh tawh niin a then DPR siam zawh tawh a ni a, la siam zawh loh te pawh peih fel thuai beisei a ni bawk.
Transport minister hian Tuirial Dam chu IWT project atan chauh ni lo a, zin mite hip thei tura tourism atana hmuhma tha tak awmna a ni tih sawiin, ruahmanna hlawhtling tak kalpui a nih theih nana zirchianna, feasibility study kalpui a pawimawh thu Union Minister Sonowal a sawipui bawk.
Minister hi Transport Director Er. R Lalrammawia’n a tawiawm a ni.