Aizawl: Zo Re-Unification Organization (ZORO) chuan Free Movement Regime (FMR) titawpa India-Myanmar ramri kan tura Border Crossing Permit lak a ngai ta chu pawi an tih thu an sawi.
Thawhtannia an thuchhuahah ZORO chuan, sorkar laipui Ministry of Home Affairs (Border Management -I Division)-in Mizoram chief secretary hnenah December 24, 2024 khan lehkha thawnin, India-Myanmar International ramri kal kan tura thil tih dan tur a rawn hriattir dungzui a, Mizoram sorkara Home department in December 30, 2024 ah Mizoram DGP hnenah ramria hma lak dan tur a thung leh, hemi dungzuia Champhai SP in hriattirna tichhuaka ramri kal tlang turte reng rengin Border Pass an neih a ngaih tur thu a puang chu tha lo an tih chu an sawi.
ZORO chuan United Nations Declaration on the Rights of Indighenous Peoples 2007 Article 36-ah chuan, ‘Tualchhuak hnamte, a bik takin khawvel sorkar ramri khamin a thendarhte chu an inkalpawhin an intanpui ang a, sakhaw thil leh khawtlang thil, ei leh bar leh politics-ah te anmahni mi leh sate nen in pawha in pawl ho theihna dikna chanvo an nei’ tih leh ‘Ram roreltute chuan tualchhuak hnamte nena inbe rawnin hetiang dikna chanvote hi tipuitling turin hma a la ang’ tihte chu UN General Assembly-a sawi hoa pass a nih lai khan India chuan he Declaration hi tha tia vote-tu a ni a. Hemi chungchangah hian ZORO pawhin India president leh prime minister hnenah pawh lawmthu a sawi tawh thu an sawi.
ZORO chuan, “Tunah UN Declaration on the Rights of Indigenous Peoples 2007 chu a dodal zawngin hma a la a, tun hma atanga Zofaten zalen taka kan inkalpawhna Free Movement Regime chu a thiat ta a, Border Pass tel lo chuan tuma’n ramri kanin kan unaute tlawh pawh phal a ni ta lo,” tiin, he FMR titawpa India-Myanmar ramri kan tura Border Crossing Permit lak a ngai ta chu pawi an tih thu an sawi a. He dikna chanvo pek an hmang thei lo tur chu an dikna chanvo rahbehna a nih avangin, India sorkar laipui hian FMR a tihtawpna hi hlip leh ngei tura ngenin, an dikna chanvo nei let leh turin a tawp thlengin a bei zel dawn tih an sawi bawk.