China rama hri leng mek Human Metapneumovirus (HMPV) chu India ram naupang zingah pawh kai pasarih hmuhchhuah tawh an ni a, heng mite hi Bengaluru, Nagpur, Tamil Nadu leh Ahmedabad-a mite an ni.
He hri leng hian thawk lamah harsatna a thlen nia sawi a ni a, tin China rama a hluar chhoh mek lai a ni bawk. Hetihlai hian union health minister JP Nadda chuan Covid-19 anga hlauhawm a nih loh thu leh enkawl that chuan tihdam harsa lo tak a nih thu a sawi a, chiaina tur a awm lo a ti.
Nadda chuan, ‘HMPV hi virus thar a ni lo a, kum 2001 a hmuhchhuah daih tawh niin, khawvel hmun hrang hrangah pawh kum tam tak chhung kha a lo darh tawh,’ a ti a. Ram mipuite chu chiai lo turin a chah.
India Council of Medical Research (ICMR) chuan Bengaluru-ah hri kai pahnih an hmuchhuak tawh tih sawiin, hmeichhe naupang thla thum mi phei chi December thla khan khawsik leh natna dang tenau a neih avangin a lo positive tawh a, mahse dam taka chhuahtir leh tawh a nih thu an sawi.
ICMR chuan naupang hetiang case dang nei pawh enkawl mek an neih thu an sawi a, tunah chuan an dinhmun a ziaawm chho leh mek tawh tih an sawi bakah, enkawl hma chuan natna dam hma tak a nih thu an sawi.