Aizawl: Health department chuan tun hnaia natna leng thar Human Metapneumovirus (hMPV) chungchangah mipuite chu lo chi-ai lo tura chahin, he natna leng hi kum danga leng thin ang tho an tih thu an sawi.
Thawhtanni khan Health Minister Lalrinpuii kaihhruainain, Health department hotute chuan tunlai natna leng thar hMPV chungchanga India ram leh Mizoram dinhmunte an thlir ho vin, ruahmanna hrang hrang an siam nghal.
He thutkhawmah hian Health Minister chairman-na hnuaiah he natna chungchang viltu tur Core Committee on HMPV din nghal a niin, State level-ah leh district tinah Rapid Response Team te pawh siam a ni bawkin, Health system leh Surveillance network in uluk leh fimkhur takin a vil reng a, hri leng darh palh thutah pawh hma la vat thei turin Health department chu a inrin reng tih an sawi.
Health department chuan sorkar damdawi in leh private hospital zawng zawng ten IHIP report hmanga ni tin hetiang ang case (ILI, SARI etc.) an neih leh natna dang report thin turte uluk leh kim taka report turin a hriattir a. Mipui te pawh hetiang natna rinhlelh an kai anih chuan, mahni awmna atanga hnai ber Sub-centre/Health and Wellness Center emaw, damdawi inah in-report vat tur leh, he hri tlang natna hi tlang hri leng chikhat a nih bakah kum danga leng thin ang tho a nih avangin mipuite chu lo chi-ai mai lo turin a chah bawk.
Hriat ve mai maiah:
- Tun tum China a hrileng hMPV hi tlang hri leng chikhat a ni a, kum danga leng thin ang tho a ni. Tunah hian Karnataka state-ah naute thla thum mi leh thla riat mi-ah hmuhchhuah a ni a, an dinhmun ngaihtuahawm an ni lo a, dam lam pan zelin pakhat chu damdawi in atanga chhuah tawh a ni.
- He natna hrik hi China chauh ni lo, khawvel pumah kum tin a leng a, kumtluan a leng a ni a, hritlang satliah angin a langchhuak thin.
- Health Department chuan IDSP kaltlangin he natna hi uluk takin a vil reng a, tun hnaiah Influenza like illness (ILI) leh Severe Acute Respiratory Illness (SARI) case tam thar thut report a awm hran lo.
- ICMR leh a hnuaia laboratory hrang hrangin respiratory virus an test te: adenovirus, hMPV, RSV etc. positive pung thut a awm lo. Mizoramah pawh Zoram Medical College (ZMC)-ah test theih tura ruahmanna siam a ni.
- Hetiang thil thleng thut a inralrinna-ram pum huap drill neih tawh chinah respiratory illness lo pun belh pawh nise, inpuahchahna tha tak neih a ni.