Aizawl: Tuichangral Zirlai Pawl (TCZP)-in Zakapa Hall, Sialsuk-a General Assembly an neih hmanpuitu, Adviser to CM Lalmuanpuia Punte chuan sorkar policy hand holding hmang tangkaia entrepreneurship lamah tan lak a tul thu a sawi.
Thawhlehni khan TCZP General Assembly vantlang inkhawma khuallian, Hrangturzo bialtu MLA ni bawk chuan Tuichangral mipuite hi Mizo hnam Mizona vawng nungtu tha an nih thu leh an ze tha tak vawng nung zel turin a chah a. Zo hnahthlak hnam hrang hrang hi Mizo vek an ni a, an tawngte humhalha hman uar deuh deuh a tul thu sawiin, “Kan hnam thuamte pawh chawi nunga keimahni ngeiin inbel tama kan ngaihsan thar a tul hle, hnam dang zingah pawh vawrh lar kan tum tur a ni. Khawpui inngaihsansiakna tihboa thalaiten mahni khaw chhuahna leh seilenna hmun ngaihhlut nachang kan hriat thar a tul hle,” tih sawiin, khawi hmunah pawh taima taka an thawh chuan eizawnna tur a awm a, sorkar policy hand holding hmang tangkaia entrepreneurship-a tan lak a tul thu a sawi bawk.
He hunah hian TCZP President Lalthawhsaka Fanai pawhin thu a sawi a. Asst Prof. David Lalrinchhana chuan ‘Tuichangral hmasawn nan zirna uar’ tih thupui hmangin zirtirna a pe.
TCZP huam chhungah hian khaw 14 awmin General Assembly vawi 11-naah hian hruaitu thar thlanna leh rorel neih a ni a, palai mi 200 vel an riak lut a ni.