Aizawl: Minister of State F Rodingliana chuan hmasawnna hna chak zawka kalpui a nih theih nan sorkar laipui atanga sum tam zawk hai chhuak turin theihtawp an chhuah dawn tih a sawi.
Thawhlehni khan F. Rodingliana hoin a pisa-ah a department enkawl pathum P&E, Commerce and Industries leh Printing and Stationery-a thawktuten kum thar inhlan tharna an nei a. He hunah thusawiin F Rodingliana chuan, Pathiana inkawl tir hi a pawimawh a, thil hote avangin a ram pumte pawh a chhiat theih tih sawiin, “State pawn atanga power lakluhna pakhat hi min se, a ram pum kan buai a ni mai a. Chuvangin, kum lo tharah hian Pathian hnena inkawltir hi a pawimawh a, tluang taka min kaihhruai a, a malsawmna tam zawk kan dawn theihna atan inhlan thar reng hi a pawimawh a ni,” a ti.
F. Rodingliana chuan hmasawnna hna chak zawka kalpui a nih theih nan sorkar laipui atanga sum tam zawk hai chhuak turin theihtawp an chhuah dawn a, inbuatsaihna pawh kawng hrang hranga kalpui a ni tih a sawi a, krismas leh kum thar liamta chhung khan mipuiten kawlphetha-ah harsatna an tawh loh nan theihtawp an chhuah a, kum hmasa lamah kha chuan kawlphetha khaihlak vangin mipui lam atangin complain an dawng nual a, kuminah erawh dawn an nei lo tih sawiin, hei hi thawktute inpek vang a ni tih a sawi.