Aizawl: Mizoram Public Service Commission (MPSC)-in tun hnaia H&FW Department hnuaia Entomologist hna lakna a kalpui dan chungchangah MPSC-a thawktute leh MZP General Hqrs. hruaitute chu MPSC Office-ah niminpiah khan an inkawm.
An inkawmnaah hian MPSC Secretary Dr. H.Lianzela hovin MPSC official paruk an tel a, MZP lam aiawhin an President, H. Lalthianghlima hovin OB mi pali leh Adviser te an tel.
December 12, 2024 a MZP thuchhuahin a tarlan ‘MPSC-in Entomologist hna a lak dan leh Veterinary Asst. Surgeon hna a lak dan hi chhui chiang a, a tul anga hma la turin Mizoram sorkar a ngen a. December 20, 2024 ral hmaa hmalakna a awm lo a nih chuan, hmalak zel dan tur a ngaihtuah dawn a ni,’ tih chungchang ngaihtuah ho tura inkawmkhawmna leh kumthar thingpui inhona neih a ni.
Boruak tha tak hnuaiah inkawm a ni a, MZP lamin an thil hriat duh leh hriat chian loh an neih hrang hrangte leh dikhlel ni a an ngaih laite thil awmzia diktak hmaichhanah inhrilhfiahna hun hman a ni.
MPSC leh MZP hian hun lo kal zel turah thawhhona tha tak nen inpawh taka hmalak ho zel tha an ti tlang a, MPSC zahawmna humhim a nih zel theih nan leh tha taka a kal theih nan thawhdun zel nise an ti bawk.