Nitin lirthei a pung a, a kum telin kan khawpui a tawt telh telh bawk. Lirthei dan bawhchhia man pawh a pung reng a, traffic police hotu phei chuan hri lengin hemi lam kawngah hian nghawng a neih lem loh thu an sawi hial.
Khawpui kawngpui a zau belh lo a, hnathawh tura ruahmanna la siam laih laih chauh a ni chungin lirthei erawh a tam reng a, nitin a pung thur thur reng bawk si. Traffic police lam hi heti lam kawngah hi chuan thawk tha tak an ni.
Aizawl City Traffic Police hotute sawi danin, Covid-19 len hma, nun phung a pangngai lai, 2019-ah lirthei dan bawhchhia 13,125 man a ni a, hri len hnu thla tam tak chhung inkharkhip kalpui a nih kum, 2020-ah dan bawhchhia 11,253 man an ni a; hri len hma leh hri len hnu inthlauhna hi 1,872 chauh a ni.
Traffic Police chhinchhiah danin kum 2017 atanga 2021, kum nga chhungin lirthei dan bawhchhia 67,120 an man a, dan bawhchhiate sum chawi tling khawm chu Rs 2,65,17,100 a tling hial. Heta lang chiang tak mai chu dan lova lirthei khalh kan tam hle tihna a ni a, lirthei khalhtute zingah fimkhurna tlachham, license neih dan dik lova nei an awm hian nasa takin dan pawisakna a thlen niin a lang bawk.
Kan kawngpui a chep telh telh a, hmasawn tuma ke pen mek a nih lai hian lirthei tam zel a reh lawkin a rinawm loh bawk si. Chuvang chuan traffic police lam hi a tul anga thuam chak a, tih len deuh deuh a tul hle awm e.