Nikum chhung khan Cyber Crime Police Station CID (Crime)-ten thubuai 41 an ziak lut a. Heng zingah hian pawisa vanga thubuai ziah luh (financial crime) a tam ber.
Cyber Crime hotuten an chhinchhiah danin nikum chhunga thubuai an ziak luh kaihhnawihah hian mi 30 man an ni a, mi panga chu kumtlinglo an ni a. Thubuai siamsak hi mi 18 an ni a, thubuai pahnih thar thawh niin thubuai 15 chu ngaihtuah tura dah rih a ni.
State dang nena inkungkaih thubuai pariat chu ngaihtuah tura la dah rih a ni a, state dang nen inzawm la chhuichhuah theih loh pasarih a awm a, thubuai 16 chu ngaihtuah leh tura dah rih a ni bawk a. Heng thubuai avang hian convict erawh an awm lo.
Nikum chhunga an thubuai ziah luh zingah pawisa vanga thubuai ziah luh a tam ber a. National Cybercrime Reporting Portal (NCRP) atangin financial crime-ah hian case hrang hranga atangin sum hmuh let hi Rs 89,61,995 a ni a, pawisa la hmuh leh loh hi Rs nuai 92.61 a ni a, a vaia belhkhawm hi Rs 1,82,22,995 a ni a. Financial crime avang hian mobile phone 106 block a ni.
Kum 2021 atang December 16, 2024 thleng khan Cyber Crime-ah hian thubuai 296 ziah luh a ni tawh a, heng thubuai avang hian mi 106 man an ni a. Mi 38 convict an ni tawh.
Kum 2022 kha Cyber Crime-in case an ziah luh tam ber kum a ni a, case 188 ziah luh a ni a, hemi kum hian convict pawh mi 17 an awm a, convict tam ber kum a ni.
Hemi kum vek hi financial crime ziah luh tam ber tum a ni a, case 107 ziah luh a ni a. Kum 2023 kha hun sualna (sexual harassment) avanga thubuai ziah luh tam ber tum a ni a, hemi kum hian case 19 an ziak lut.