Aizawl: Ni hnih cham tura Mizoram tlawha zin, Union Minister of State for Tribal Affairs, Durga Das Uikey hnenah Social Welfare & Tribal Affairs Minister Lalrinpuii chuan sorkar laipuiin scholarship sum pe chhuak thuai theih nan hma laksak turin a ngen.
Thawhlehni zan khan Regency Hotel Conference Room-ah Minister Lalrinpuii hian Union MoS Uikey mikhualin thu pawimawh hrang hrang an sawi dun a. Minister chuan sorkar laipui atanga sum hmuh hmanga hnathawh leh thlen chinte a hrilhfiah bakah harsatna leh mamawhna tawhte a sawifiah a. A bik takin sorkar laipuiin scholarship sum a pek chhuah thuai theih nan hmalaksak turin a ngen.
Union minister chuan India rama tribal-te tihhmasawn a ngaih pawimawh thu sawiin sorkar laipui chuan India ram pumah leh a bik takin India hmarchhak state-a tribal hnam hrang hrang chengte hmasawn nan tan a lak ngawrh thu leh ram chhunga cheng zawng zawngte tan hmasawnna rualkhai leh huam kim tak siam a pawimawh thu a sawi.
Uikey chuan sorkar chuan tribal zingah pawh hnam hnufual zawkte chawikang tura Ministry of Tribal Affairs kaltlanga ruahmanna a siam hrang hrangte a sawiin Mizoram tan pawh tun kum nga chhunga Ekalavya Model School atan te, Tribal Research Institute leh hmalakna dang hrang hrang atana sorkar laipui atana sum pek chhuah dante a sawi a. Mizoramin chak taka hma la zel tura a duhsak thu a sawi a. Sum rang zawka pek chhuah belh zel a nih dawn chuan chak zawka hman zawh a tul avanga hnathawh chak a tul thu a sawi bawk.
Union minister chuan nimin khan Mamit tlawhin vawiin hian Aizawl a chhuahsan dawn a ni.