Aizawl: A vawi khat nan Mission Governing Council of Mizoram State Skill & Entreprenuership Development Mission (MSEDM) chu nimin khan an chairman Lalduhoma, Chief Minister hovin CM Conference Hall-ah an thukhawm.
Thutkhawmah hian Member Secretary Lalmalsawma Pachuau, Secretary, LESDE chuan Governing Council dinhmun leh mawhphurhna a sawi fiah hmasa a. Labour, Employment, Skill Development & Entreprenuership Department, DAY NULM, MzSRLM, Mizoram Startup Mission leh Commerce & Industries department ten skill development an kalpui dante pawh sawi a ni.
Mizoram State Policy for Skill & Entreprenuership Development 2018 tihhlawhtlin nan sorkar chuan MSEDM a din thar a. Mission Governing Council, Chief Minister Chairman na hnuaia mi hi MSEDM a thuneitu sang ber a ni.
India ramah skill development hi mission anga kalpui chhoh mek niin, MSEDM chuan Mizoram sorkar hnuaia skill development lam kalpui department te mumal leh lian tham taka mission pakhat hnuaia kalpui dan a dap dawn a ni.
Thutkhawmah hian Governing Council Vice Chairman Lalnghinglova Hmar, Minister, LESDE, Khilli Ram Meena, IAS, Chief Secretary leh member dang te an tel.