Hla phuah thiam leh zai thiam ni a, All India Radio artist ni bawk C Vanlalzuia (Mazuia), kum 50 chu accident avangin a boral.
Thudawn danin, C Vanlalzuia hi Champhai Zote dai, Ngur khua nena an inkara Sathar khamah an nupaa chuanna Auto Rickshaw chu nilaini tlai chesualin, kawngthlangah an tla liam a, chetsualna hmunah hian Hmangaihzuali W/o C. Vanlalzuia chu boral nghalin, C. Vanlalzuia S/o Savunga (L) chuan hliam na tak a tuar a, Champhai District hospital thlenpui a nih hnuah a thi zui ve ta a ni.
C Vanlalzuia hi thangthar zawkte chuan kan hre lo mai thei. A hun hmasa lamah lengzem phuahin a sa thin. ‘Derna Anka’ hla a phuah leh sak atang hian mi hriat pawh a hlawh hle. ‘Irene I Tan’ tihte, ‘Then lohna ram’ tih hla phei chu Mizo film hmuhnawm tak ‘Hmangaihtu Thinlung’ film hla atan hman a ni nghe nghe.
Gospel lama a kal hnuah hla eng emaw zat phuahin a sa bawk a, chung zingah ‘Haleluiah Amen’ a lar pui hle bawk.
Nimin khan an nupa hian vuiliam an ni ta a ni.