Aizawl: East Tuipui bialtu MLA Ramthanmawia chuan Farkawn Water Supply Scheme (Solar Pump) hna thawh mek chu a hmunah a enpui.
NABARD RIDF XXVIII hnuai atang thawh Farkawn Water Supply Scheme ( Solar Pump) hi Rs vbc 15 man zet niin, Tiau tui pump tur a ni. Tui pump hna hi Exelsoirs Merchants ten an thawk mek a. Stage 5-a pump tur niin ni tin tui litre nuai 4 a pump thei dawn a ni.
Tunah hian hna hi zaa 85 thawh zawh tawh niin, kumin March thlaah zawh tura ruahman a ni. A enkawl hna hi Champhai WATSAT Circle hnuaiah Champhai WATSAN Division leh Khawbung WATSAN Sub-Division ten an enkawl a ni.
A tlawhnaah Ramthanmawia, MLA chuan a bial chhung, a bikin Farkawn bik hi JJM hmanga tui lak te an kham khawp loh avangin tui an harsa em em tih sawiin, “Fund dang remchang zawngin theih tawp kan chhuah a. Sorkar hmasa hunlai khan sorkar duhsakna changin, NABARD RIDF XXVIII atangin fund kan hmu thei ta hlauh mai a, kan lawm tak zet a ni. He scheme hi thawh zawh a nih hunah chuan Farkawn khuain tui hnianghnar tak an hmu thei tawh dawn a ni,” a ti.
Ramthanmawia chuan he Water Scheme a hlawhtlin theih nana theihtawp chhuahtu PHE thawktute chungah lawmthu sawiin, “An ni theih tawp chhuahna zarah tun hun hi kan thleng a ni. He scheme hlawhtlin theih nan hian an thawkrim em em a. An tha leh zung leh ngaihtuahna tam tak an seng a ni,” a ti a; Contractor Excelsoir Merchants ten hna tha taka an thawh vanga leh Farkawn khawtlang mipuite thlawpna avangin lawmthu a sawi bawk.