Vur nasa taka tla leh thli chak tak thawh avangin UK-ah chuan veivahna a tibuai hle a, zan lamah chuan khaw vawh lam pawh -11°C a ni.
UK ram pumah Ningani khan vur sur nasa tur avangin ‘yellow weather warning’ pek chhuah a ni a’zan lamah a vawt hle dawn’ tih sawi lawk a ni bawk.
Khaw awm danin a zir loh em avang hian veivahna a buai a, rel leh thlawhna tumhmun tlankawng tam tam tak khar a ni.
Manchester Airport chu Ningani tukah khan ‘vur chhah lutuk’ avangin a pahnihin khar a ni a. Then fai tumin nasa taka beih niin ‘a rang thei anga tihfai’ a ni dawn tih an sawi.
Wales-ah pawh ‘thli na tak, ruah leh vur tla’ vangin rel kawng tam tak khar a ni a. Thawhtanni thleng atan Llandudno Junction leh Blaenau Ffestiniog inkarah rel aiah bus tlantir a ni dawn.
Signalling system buai avangin Crewe leh Wilmslow inkara veivahna a buai hle bawk a, hei hian Avanti West Coast, CrossCountry, Northern & Transport a buai phah.
Great Western Railway chuan tui lian avangin Cornwall-a Liskeard leh Looe inkar khar a ni tih an sawi a. Nilaini khan Devon leh Cornwall-ah vur tla avangin veivah a buai hle a, kawngpui pawh eng emaw zat khar a ni tih Devon leh Cornwall Police leh Devon County Council Highways chuan thuchhuah intawm an siamah an tar lang.
Met Office chuan Nilaini zana a vawhna ber chu Shap, Cumbria niin -11.2°C a ni a. -16°C thlengin a tlahniam thei dawn niin an sawi.