Union Minister of State for Tribal Affairs Durga Das Uikey chuan nimin chawhma khan Tlangnuam venga Eklavya Model Residential School (Tribal Residential School) a tlawh a. School building leh hostel sak tha tawk lo siam tha turin department hotute leh contractor te a hriattir.
Union Mos Uikey hian EMRS a tlawhnaah hian India ram pumah hmasawnna inkhairual a awm a pawimawh thu leh, chumi tihlawhtling tur chuan zirna tihhmasawn a tul thu a sawi a. EMRS-te chu zirna tihhmasawn nan mi tin banphak leh entawntlak a kalpui a pawimawh thu a sawi.
Zirtirtute chu naupang nun kaihruaitu pawimawh tak, nun kawng dik leh hlawhtlinna kawng kawhhmuh hna thawktu an nih angin khawvel hna zinga zahawm leh ropui ber pawla a ngaih thu sawiin Uikey chuan, EMRS chu naupang tam takin zirnaa hlawhtlinna an chharchhuahna hmun pawimawh tak a siam turin thawktute a chah.
Hetih lai hian, BJP Mizoram thuchhuahin a tar lan danin, Union MoS Uikey chuan school building leh hostel sak tha tawk lo chu pawi a tih thu leh siam that ngai te siam tha turin department hotute leh contractor-te hriattir nghal a. Social Welfare department thawktu leh contractor te chu an fate awmna tur anga ngai a, tha tak a thawh a tul thu a sawi a, tribal naupang te guardian an nih anga hna thawk zel tur leh hna tha lo thawktu chu chunglam pawhin a ngaihdam theih a rinloh thu a sawi.
Union MoS hi Social Welfare & Tribal Affairs Secretary, Director leh Officer, school-a thawkte leh zirlai naupangten an lo dawngsawng a ni.
Hlawk taka central scheme kalpui tul ti
AZL: Union Minister of State for Tribal Affairs Uikey chuan nimin khan thu thar thehdarhtute chu kawmin state sorkarin mipuite tan tangkai leh hlawkthlak thei ang bera central scheme kalpui a tul thu a sawi.
Zarkawt-a Hotel Regency-a thu thar thehdarhtute a kawmnaah Uikey chuan prime minister duh dana Mizoram tlawha rawn zin a nih thu a sawi a. Tribal Affairs ministry hnuaiah hmasawnna hnathawhna tur hrang hrang state hnenah pek chhuah theuh a nih thu a sawiin, “Mipuiin an chhawr tura pek a nih ang ngeiin, state sorkarin mipuite tan tangkai leh hlawkthlak thei ang bera central scheme-te kalpui a tul,” a ti.