Lersia Play chuan Mizo film lei sual a awm tawh loh nan kumin atang hian uluk zawka hralh chhuah turte endik hmasak tumin, screening uluk lehzuala kalpui an tum.
Nikum khan kum dang aiin Mizo film chhuah a tam fal hle a. Hei hian film siam lamah hma a sawn tih pawh a lan tir bakah, eizawnna tling ni ve ta niin mi pawhin an ngai. Film lam tui mi te pawhin an siam ve zel ni te pawhin a lang a. Hemi chungchangah Lersia Play hotute chuan Mizo film ngaihlua lo leisak tute chungah lawmthu an sawi.
Film siamtuten tan an lak sauh sauh a pawimawh tih sawiin Lersia Play hotute chuan, “Kan film siam mipui tan lei tlak a nih theih nan Lersia Play pawhin kum thar atang chuan uluk zawka hralhchhuah turte enfiah hmasak kan tum a ni. Viewers thenkhatin, ‘a trailer ah a hmuhnawm hmel si a, kan han leia a hmuhnawm loh lutuk, pawisa ka ui,’ tite an awm a, thil awm thei tak niin a lang a, screening uluk lehzuala kan tih chuan lei sual a awm tawh lo turah kan ngai,” an ti.
Lersia Play hotute sawi danin, an launch atanga vawiin thleng hian feature film 110, short film 9 leh series 5 an tichhuak tawh a. An launch tirh atanga chhutin tun dinhmunah Rs vbc 12 an hmuchhuak tawh a. Nikum bikah khan film 44 an tihchhuah tawh atangin sales an hmuh tawh zat chu Rs vbc 6 a tling tawh a ni. He thuziak i chhiar hi chuan hei hi a danglam leh tawh thei thung.
Kum 2021 khan Lersia Play hi launch a ni a, Lailen leh Leitlang Picures te din niin, sorkar leh mimal atanga tanpuina leh investment engmah awm loa bultan a ni a. Leitlang Pictures hian film production lamah hun an inpek duh avangin June 2022 atangin Lailen hian an nei pumhlum ta a ni.