AZL: Mizoram Presbyterian kohhran chuan January 11, 2025 (Inrinni) hi Mizoram Presbyterian Kohhran Din Tan Ni atan an hmang a, tualchhung kohhranten an remchan dan angin chhun lamah emaw, zan lamah emaw hun an hmang.
Kohhran tam zawk chuan zan lamah he hun hi an hmang a. Kuminah hian chhun leh zan atan thupui zir tur ruahman a ni a, chhun lamah ‘Chanchin Tha leh Kohhran’ tih leh zan lamah ‘Hei leh chen hi Lalpan min pui a ni’ tih chu zir ho a ni.
Kum 2014 Synod Inkhawmpui chuan ‘Kan Kohhran din kum chu 1894 January 11 a ni e,’ tiin a rel a. Kum 2016 Synod Inkhawmpui chuan ‘Mizoram Presbyterian Kohhran din tan ni hi Synod Ni pawimawhah telh ve ni rawh se’ tiin a rel leh a, Synod Executive Committee (SEC)-in bawhzuiin ‘Mizoram Presbyterian Kohhran Din Tan Ni January 11 hi kum 2018 atangin hman tan ni sela – Synod Calendar-ah telh ni se, Synod Holiday-ah telh ni se’ tiin a rel a ni.