Aizawl: Inrinni zingkar khan Baptist Church of Mizoram (BCM) buatsaihin missionary hmasa pahnih, Sap Upa leh Pu Buanga ten Mizoram leilung an rah ni champha vawi 131-na pualin BCM Complex, Serkawnah hun an hmang.
BCM in Missionary Day vawi 131 puala hun an hman hi Rev R Lalthanmawia, Assistant General Secretary (Mission)-in a kaihruai a, Rev R Lalbiakliana, General Secretary, BCM-in thu a sawi.
Rev R Lalbiakliana chuan Missionary Day vawi 131-na an thleng leh thei chu lawmawm a tih thu leh, he hun hian kohhran inpumkhatna tha thlen se, kohhran bil mai ni lovin Mizoram pum kohhran te hian inpumkhatna hmanruaah hmang thei se a duh thu a sawi.
Rev. R. Lalbiakliana chuan, “Kum 1894-a Sap upa leh Pu Buanga ten chanchin tha an rawn thlen hi a hlu a, ziak leh chhiar thiamna, A, Aw, B min siamsak avanga thingbul, lungbul biate Pathian khawngaihna azara dinhmun duhawm taka kan ding thei te hi a ropui takzet a. Vawiinah hian Pathian hnenah lawmthu kan sawi a ni,” a ti.
Inkhawmah hian Chief Minister Lalduhoma aiawha thu sawiin Lunglei West bialtu MLA T Lalhlimpuia chuan, Sap upa leh Pu Buanga te hnathawh ropui a tihzia sawiin, “Mizo-English Dictionary min siamsakte hi a hlu a, hmasawnna tur ege nge kan neih tih inzawt zelin, Johana 17:21 behchhanin inpumkhatna nei turin bul tan tha leh ang u,” a ti.
Chief minister pawhin BCM hmalakna hrang hrang, tihdam rawngbawlna, ruihhlo do leh hnuchham enkawlna hrang hrangte ropui a ti hle tih sawiin, hemi piah lamah kohhran inpumkhatna turin tun aia nasa zawkin kal theih nise a duh tih a sawi bawk.
He hunah hian Rev. H. Lalhmingmawia, Administrative Secretay, PCI pawhin Mizoram Synod aiawha thu sawiin, PCI chuan duhsakna sang ber a hlan thu leh Pathian hnathawh lang zel se a duh tih a sawi. BCM in hun an hmanna a an sawm chu lawmthu sawiin, hun hman ho zel theih nise a duh tih a sawi.
Rev. R. Lalnunzira, AGS (Service) chuan missionary pahnih te chanchin leh hnathawh te sawiin, Pathian hnena lawmthu sawina chu kalkhawmten a rualin an chhiar a, hemi hnu hian BCM zaipawl leh Synod Choir (Lunglei) ten hla an rem a. Rev. Dr. P.L. Lianzuala chuan malsawm tawngtaiin a tin a ni.
Inkhawmah hian BCM Hqtr. leh tualchhung kohhran hrang hrang hruaitu, HPC Vice Chairman, Lunglei khawpui chhunga MLA, Councellor leh MJA te sawm an nih angin an kal a. Hetiang programme hi BCM-in a huaihawt vawi khatna a ni.
Missionary Day puala zingkara hun an hman bakah, chhun lamah tual chhung kohhranten awmni khama Pathian faka lawmthu sawia hun hmangin tlaiah ruai an theh a ni.