Aizawl: MNF Party chuan nimin khan kumin atana Mizo Hnam Run hawnna inkhawm an nei a. He hunah MNF President Zoramthanga chuan thu sawiin, kum 2028-ah MNF an sorkar chuan buhfai man leh tuialhthei man an ngaihtuah tha leh dawn tih a sawi.
MNF President Zoramthanga chuan inthlana tlaknate hi vanpui chim ang maia ngaih tur a ni lo va, dawt atan an chakna tur a nih thu sawiin, “Inthlanah tlak chang a awm, a chhan pawh chi hrang hrang a awm ang. Pathianin MNF hi chhan neiin a din a, a ral a phal lo, a man tam tak kan pe a ni. Inthlanah tla mah ila, a dawtah kan ding chhuak leh mai. Party tam tak an ral hnuah pawh MNF chu hotu an liam pawhin Pathianin a dang a dah zel,” a ti.
Zoramthanga chuan VC thlan hun pangngai chu August thla lam tur a ni a, chhan tha awm lovin ZPM sorkar martial law-in February-ah thlan tur tiin an pawh tawisak a. Hei hi a nihphung tur a nih loh avangin an Minister-ten an insawifiahsiak a. Chhuanlam tur pawh an sawi dik thei lo va. VC Association chu high court-ah an zualko mek tih a sawi.
Chief minister hlui, Zoramthanga chuan ZPM sorkar chu reilo te an sorkar chhungin an thil tihah an kal dik hlei thei lo nia puhin, “Lengpui Airport pawh Air Force kuta pek an tum ngawtte kha khawvela awm ngai lo a ni. Sipai kuta kan hrawk rehtir tlat ang a ni,” tiin, MNF chuan sipai kuta Lengpui Airport kuta pek chu MNF chuan a tawp thlenga an do zel dawn thu a sawi.
ZPM sorkarin buhfai man a letin vawi lehkhatah an tito thut hi tha an tih loh thu sawiin Zoramthanga chuan, “Kum 2028-ah MNF tlinpui kum a thlen ka ring. Buhfai man pawh kan ennawn ang. Petrol leh diesel pawh cheng hnih khat mai ni lo, cheng sariha an tito thut hi MNF chuan kan ngaihtuah tha leh dawn,” a ti.
ZPM sorkarin SASCI pawh an duh dan danin an kalpui tih sawiin MNF President chuan, “Kan hnathawh sa chhunzawm lovin an insem a, utilization certificate an pek mumal theih loh avangin kum khata Rs. vbc 500 vel hmuh thin kha, Rs vbc 250 chu an chân der tawh a ni,” a ti a. Kumin hian Delhi khawngaihna an dawng lo a nih chuan an buai hle dawn niin a sawi.
Inkhawm hi MNF Sr. Vice President Dr. R. Lalthangliana’n a kaihruai a. MNF President hian Ralthuama Ralte, Bethlehem Vengthlang (former Jt Director, UD&PA) chu MNF-ah a lawmlut bawk.