Aizawl: Mizoram Pradesh Congress Committee (MPCC) President Lal Thanzara chuan Congress an sorkar leh a nih chuan NLUP an thar thawh leh dawn tih a sawi.
Thawhtanni khan MPCC chuan Bhavan hawnna inkhawm, Congres Bhavan ah an nei a. He huna thusawitu MPCC president chuan kum kalta khan an party-in Pathian malsawmna leh kaihruaina tam tak an dawng a, an unit-te kaltlangin hruaitu tha tak tak pekin an awm avangin lawmawm a tih thu a sawi.
Lal Thanzara chuan, “Special Assembly-a ka puan tawh angin, Congress kan sorkar leh a nih chuan kan Bible-in a sawi, ‘He’ng ka unau tê berte chunga in tih hi ka chunga ti in ni’ a tih angin, Mizoram mipuite tan NLUP kan tharthawh leh dawn a ni,” a ti.
Chawlhkar kalta khan Mizoram BJP President chuan ZPM sorkar chu central BJP hotuten an thlir reng thu leh lei ven that a tul thu a sawi tih sawiin Lal Thanzara chuan, BJP MLA Dr K Beichhua chuan an harsatna sutkianna tha ber tur chu BJP zawm mai a nih thu a lo sawi tawh bawk tih sawiin, “Heng Mizoram BJP hruaitute thusawi hian awmzia a nei thuk viau awm mang e. Ka hmelhriat pakhat, Central BJP hruaitute nena innel tak pakhat chuan kan sorkarin Central-a project an zu theh luh te hi central khuan tihhlawhtlin an chak viau lovin a sawi a, dawt a sawiin a rinawm loh a ni,” a ti.
MPCC President chuan hmani lawk khan Assam Rifles chhuah hun tur a lar a, tun lai hian February ni 20 a lar leh ta tih sawiin, “Kan sorkar hian VC term pawt tawiin Febuary 19-ah an titawp a. Chumi hma chuan VC inthlan a ngai ngei ngei a ni. Sawhthing an lei theih dawn leh dawn loh hriat a nih hma inthlan zawh felah duh,” tiin, VC inthlan zawhah chauh sorkarin sawhthing lei an tum niin a sawi.