Mizorama kohhran member zuitu ngah ber Mizoram Presbyterian kohhran hmeichhe rorelna sang chuan kum reilote liam ta khan fa nei tam tura inzirtirna neih an lo rel tawh a, tam kan ngai pawimawh chho leh tan dawn pawh a ang viau hman.
Kan hriat angin Mizote hi hnam tlem kan ni a, kan chhehvelah hnam hrang hrang awmin, anni ho hian inthlahpun an uar a, tam na na na chuan huai hun an la nei ngei dawn. Chutiang thleng chuan kan ngaihtuah tel chhoh a ngai tawh hle.
Kan ram a zau tawk lohzia kan aupui fo a, chumi zau tawk lo pawh chu min chuh buaitu an awm chho ve reng bawk. Ramri vanga buai hun kan la nei chho zel lovang tih a sawi theih loh a; chuvang chuan engkimah kan hnam hi kan tam a ngai.
Kum 10 chuang liamta khan Mizoram a pressure group lian ber MZP chuan fa nei tam tura inzirtirna hi an rorelna sangah an lo passed tawh a, midangin an zui ve lawk lova a lan hnuah tunah kohhran hmeichhe lamin lokalpui chho ve lehin, a lawmawm lamah i ngai zel phawt ang.
Kohhran hmeichhe rorel inkhawma an passed tum khan Chhinga Veng Pastor bial atanga rawtna lut ‘Fa neih tam tura inzirtirna neih ni rawh se’ tih chu pawm a lo ni tawh a, Central committee bawhzui tura dah a ni. Anni hian engtinnge an rawn bawhzui chhoh zel tih chu hunin a la hril turah ngai ang.
Kan hnam hian tam kan mamawh a, kan tu leh fate leh tuchhuante tan pawh tun atanga tam tura kan lo inzirtir lawk hi a ngai hle a ni.