Aizawl: Vaitin khaw bul, Tuiruang luia chesual mi pahnih zinga pakhat zawk, Lalditsaka (32) ruang chu Pathianni chawhnu dar 1:25 khan hmuh a ni.
Tuiruang luia sangha man tura chhuak, Vanlalhnuaia (28) leh Lalditsaka (32) te hi January 8, 2025 chhun khan an chhuak a. An chhungten an biakpawh theih loh avangin an mangangin a tukah mi dang an pun a. Ninganiah mi thenkhat zawng tura chhuak chuan lui bul hnaiah an thawmhnaw leh an sangha man thenkhat an hmu a, anmahni chu hmuh tur an awm loh avangin Tuiruang luiah an tla a nih ringin khawtlangin Zirtawpni atang khan an zawng tan a ni.
Tuitla zawng hian Vaitin khua hi a bul, Sakawrdai leh a chhehvelten an pui a, Manipur lama Parbung leh Sartuinek atangin an pui bawk a, Pathianni chhun dar 1:25 khan an tlakna hmun nia rin, an thawmhnaw dahna thlang suar mawng atangin Lalditsaka ruang hi a langchhuak a, an khua panpui nghalin Sakawrdai PHC-ah postmortem tih a ni a, Pathianni zan vek khan vuiliam nghal a ni.