- George L. Ralte, Vaivakawn
Hmanlai kan Mizo pi leh pu te khan tlawmngaihna tih hi an ngaihluin an ngai pawimawh em em thin kha a nia.Kan tunlai khawvel changkang chho mek zel ah hian he tlawmngaihna hi nun pui tak tak kan awm laiin tlawmngaihna kan nun pui dan erawh a pawn lai ta hle niin a hriat.Mite mit mei ven avanga tlawmngai ta mai mai te pawh a awm theih hial tawh awm e.
Mitin te hian tlawmngaihna chu kan nei vek mai a, kan tlawmngaih dan erawh a in ang lo fo.Mi tlawmngai chu khua leh tui tha a ni fo angin amah avangin khawtlang a nuam a, a him a ni.Khawtlang ah thihna avanga vanduai te tan leh mi hlawhtling te tan nawmna leh lawmna a siam sak thin.
Tlawmngaihna hi Mizote ta bik liau liau leh kan pianchhuah pui bik ni a ngai kan awm thin.A dikna chen tam tak a awmin a rinawm.Amaherawh chu khawvel a cheng hnam hrang hrang te pawh hian tlawmngaihna hi an nei ve vek tho a, tlawmngaihna an neih dan erawh a dang mahn.Kan pi leh pu te atanga kan chhawm tlawmngaihna kan nei hi kan vannei tak zet a ni.Tunlai khawvel changkang chho mek zel ah hian thalai nula leh tlangval mai bak ah tleirawl te thlengin a ni ang chu tlawmngaihna an theih nghilh ta em ni chu aw a tih theih.Kan Mizo tlawmngaihna hlu ral mek ni a an hriat leh an sawi thin te hi thalai nula leh tlangval mai bak ah chhungkaw tin te hian a chhawm nun hna thawk turin tan i la thar zel ang u.
Tlawmngaihna tih nun thar leh chungchang ah hian khawtlang hruaitu te bak Kohhran hrang hrang a hruaitu ten mahni veng ah theuh leh mahni Kohhran theuh a kan hruaitu ten kan Mizo tlawmngaihna hlu tak ti nun thar hna thawk turin leh tan la thar sauh sauh tur a kan mite hnen ah kan zirtir thar a ngaiin a pawimawh tak zet a ni.
A tawp ber ah chuan kan Mizo tlawmngaihna hi keiin ka chhawm nun a, ka nunpui loh chuan tumahin an chhawm nung dawn lova,tumahin an nunpui dawn lo.Chuvangin kei hi ka pawimawh ber i ti ngam zel ang u.