Mizoram State Sports Council (MSSC) leh Samagra Shiksha chuan Sports Minister Lalnghinglova Hmar leh Education Minister Dr.Vanlalthlana hriatpuina hnuaiah Mizoram sports tihhmasawnna tura inremna thuthlung (Memorandum of Understanding) an ziak.
Thawhtanni chawhnu dar 2-a Secretariat Conference Hall-a inremna ziahah hian MoU hi MSSC aiawhin Henry Lalrawnkima, Secretary, MSSC leh Samagra Shiksha aiawhin Lalthanzira, SPD, Samagra Shiksha ten an ziak a. Sports minister leh education minister te chu hriatpuitu an ni.
Samagra Shiksha hian Grassroots Level Sports Development (GSDP) an kalpui mek a. Tun sorkar hian Bana kaih Policy hmalakna peng khat atan thalaite theihna haichhuahna (talent identification) programme Mizoram pum huapa chak taka kalpui a tum mek bawk.
GSDP hian naupang kum 6-18 a huam a, heng programme pahnihte hi sports hmasawnna lama hmalakna tur ve ve a nih a vangin kalpui tum dan leh a huam chinte inang diak diak lo mah se, thawhduna zaia khata (converge) hmalak hian Mizoram chu sports-ah hmasawnna sang zawkah a hlan kai ngei beiseina avanga inremna thuthlung hi ziah a nih thu Sports Minister Lalnghinglova Hmar chuan a sawi.
Education Minister Dr. Vanlalthlana chuan MSSC leh Samagra Shiksha in MoU an ziak chu lawmawm a tih thu sawiin, sports minister nen hian thian tha a nih thu a sawi a. He thil hi kan lo sawi dun fo tawh thin a, MoU an ziak thei hi lawmawm a tih thu a sawi a. He MoU kaltlang hian sports fund neih ang angte pawh awmze neih zawk leh tangkai zawka hmanna kawng a hawn phah dawn avangin phurawm a tih thu a sawi bawk.