Aizawl: Mizoram sorkarin village council dinglai term a pawh tawi vanga lungawi loa All Mizoram Village Council Association (AMVCA)-ten Gauhati High Court, Aizawl Bench-a sorkar an khinna chu nimin khan an hnuk kir a, vawiin lamah mi mal hminga khinna theh luh an tum.
Thawhtanni khan Mizoram sorkarin village council term a pawh tawi chungchanga AMVCA-in an khinna chu court chuan a ngaihtuah a. AMVCA chu dan anga register society an nih loh avangin sorkar an khinna chu thu tlinga pawm theih a nih loh avangin, sorkar an khinna hi an hnuk kir a. Hetih rual hian, village council term pawh tawi chungchang hi mi mal ang pawha court-a khinna theh luh theih anih avangin, vawiin hian mi mal hminga sorkar khinna hi theh luh leh nghal an tum a ni.
AMVCA hian Mizoram sorkarin an term a pawh tawina notification chhuah hun avangin Mizoram sorkar an khinna an lo hnuk kir tawh a, niminah hnuk kir lehin, a tum thumna atan mi mal hmingin an khing leh dawn a ni.
Tuna village council hi August 27, 2020-a inthlang niin, August, 2025-a tawp tur a ni a. LAD chuan tuna VC term hi February 19, 2025-a tawp turin ruahmanna an siam a ni.