Aizawl: Sorkar laipui hnuaia Women & Child Development Ministry buatsaih, Union Minister for Women & Child Development Annapurna Devi hova Udaipur, Rajasthan-a neihah Women & Child Development Department Minister Lalrinpuii a tel.
Ni hnih awh he Brainstorming Session-ah hian Rajasthan chief minister, deputy chief minister bakah state hrang hranga Women & Child Development minister leh official-te an tel a. He hunah hian Women & Child Development Department hnuaia scheme hrang hranga hmalaknate inzirtir tharna hun hman a nih mai bakah chak zawka hmalak theih dan tur kawngte sawiho a ni.
He hunah hian thusawiin Lalrinpuii chuan, Mizoram chhunga Women & Child Development Department hmalakna hrang hrang, Project thisen hlu te, nutri garden chungchang mai bakah tun hnaia Mizoram sorkar hmalaknaa ‘Widow Cell’ hawn thar a nih thu te a sawi.
Brainstorming Session ‘Chintan Shivir’ huna Best practices (Schemes hrang hranga titha zualte) tar lannaah Mizoramin Anganwadi cum Creche a kalpui dante tar lan tel ve a ni a. Mizo mipuiten tlawmngaia anganwadi building an sak thin te, nuhoin vehbur khawna anganwadi centre tihchangtlun nan mamawh hrang hrangte an thawhkhawm thin te hian fak a hlawh hle a. PALNA scheme bika department hmalakna pawh central hotuten an fak hle bakah hmeichhiate zingah 2-wheeler taxi driver awm thei khawpa women empowerment kal thatpui thu te pawh tar lan a ni a. State titha bikte hmalakna entawntlak zingah Mizoram hmalakna hrang hrang tar lan a ni bawk.